BAKI, AzerVoice

İsrail Hərbi Hava Qüvvələrinin İran ərazisinə endirdiyi hava zərbəsi nəticəsində zədələnən "Cənubi Pars" qaz yatağının 14-cü fazasına aid emal zavodunun dördüncü xətti işə salınıb.

AzerVoice xəbər verir ki, bu barədə İranın "Petropars" şirkəti açıqlama verib.

"Fars körfəzi bölgəsi son zamanlar təhlükəsizlik təhdidləri və xarici təcavüzlərlə üzləşsə də, Allahın köməyi, yerli biliklər, qətiyyət və neft sənayesinin müxtəlif sahələri arasında misilsiz həmrəylik sayəsində 14-cü fazanın emal zavodunun dördüncü şirinləşdirmə xətti uğurla işə salınıb" - deyə, açıqlamada bildirilib.

Həmçinin qeyd olunub ki, zədələnən 14-cü faza ölkə üzrə qaz istehsalının dayanmasına səbəb olmamışdı. Həmin bölmə təxminən 10 gün ərzində bərpa edilib və yenidən istismara verilib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.

ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.

İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.