BAKI, AzerVoice
İranın xarici işlər naziri Seyid Abbas Araqçi bildirib ki, Tehran hazırda ABŞ-ın nüvə obyektlərinə endirdiyi hücumlara cavab olaraq bütün mümkün variantları nəzərdən keçirir, o cümlədən Hörmüz boğazının bağlanmasını da istisna etmir.
AzerVoice xəbər verir ki, bu barədə Araqçi İstanbulda keçirdiyi mətbuat konfransında çıxış edərkən bildirib.
“Bütün variantlar masadadır. Deyəcəyim budur” – deyə, nazir Hörmüz boğazının bağlanması ehtimalı ilə bağlı suala cavabında bildirib.
"Diplomatiya üçün pəncərə həmişə açıq qalmalıdır, lakin hazırda İran diplomatiyanın bərpası məsələsini həll edəcək vəziyyətdə deyil. Gəlin əvvəlcə bizim cavabımızı gözləyək, təcavüz bitdikdən sonra diplomatiyaya necə qayıtmağı qərarlaşdırarıq” - deyə, Araqçi əlavə edib.
Qeyd edək ki, ABŞ Hərbi Hava Qüvvələri iyunun 22-ə keçən gecə İran ərazisində yerləşən Fordo, Nətənz və İsfahan nüvə obyektlərinə hava zərbələri endirib. Hücum nəticəsində hər üç nüvə obyektinin məhv edildiyi qeyd olunub.