Bakı,AzerVoice, Orxan Qədirzadə

Serbiya Prezidenti Aleksandar Vuçiç 1992–1993-cü illərdə Saraybosnada mülki vətəndaşlara qarşı snayper hücumlarında iştirak etməkdə ittiham olunmasını qəti şəkildə rədd edib. AzerVoice xəbər verir ki, iddialar Xorvatiyalı jurnalist Domagoy Marqetiç tərəfindən Milanda prokurorluğa təqdim olunan şikayətdə əksini tapıb.

Marqetiç iddia edir ki, Vuçiç Bosniya müharibəsi zamanı Serb Radikal Partiyasına bağlı könüllü silahlı dəstənin üzvü olub və Saraybosnadakı Yəhudi Qəbiristanlığı mövqelərində xidmət edib. Şikayətə görə, həmin mövqelər bölgəyə gələn xarici şəxslərin mülki vətəndaşlara “insan ov turu” çərçivəsində snayper atəşi açdığı qeyri-qanuni fəaliyyətlərin həyata keçirildiyi ərazilərdən biri olub.

İddialarda o da bildirilir ki, müharibə dövründə Saraybosnada snayper hücumlarında iştirak edənlər arasında yalnız serblər deyil, İtaliya, ABŞ, Rusiya və Kanadadan gələn şəxslər də olub.

Bosniya və Herseqovinanın müdafiə naziri Zukan Helez də daha əvvəl Vuçiçi mülki şəxslərə atəş açmaqda ittiham etmişdi.

Vuçiç ittihamları rədd edərək bildirib ki, həmin dövrdə jurnalist kimi fəaliyyət göstərib və snayper tüfəngi daşımayıb. Sosial şəbəkələrdə yayılan görüntülərlə bağlı isə dövlət başçısı kadrda görünənin tüfək deyil, “çətir” olduğunu bildirib.

Bosniya müharibəsi zamanı Saraybosna dörd ilə yaxın mühasirədə qalıb və 11.541 nəfər, o cümlədən 1.601 uşaq həyatını itirib. Onlarla uşağın snayper atəşi ilə öldürüldüyü qeyd olunur.