BAKI,AzerVoice, Orxan Qədirzadə
ABŞ-də Bosiya müharibəsi zamanı baş verən “cinayət turizmi” iddiaları ilə bağlı yeni araşdırma başladılıb.
AzerVoice xəbər verir ki, ABŞ Konqresinin Nümayəndələr Palatasının üzvü Anna Paulina Luna, X sosial şəbəkəsində yayılan məlumatlar fonunda, Bosniyada mülki şəxslərə - o cümlədən uşaqlara - pul qarşılığında atəş açıldığı iddialarının artıq rəsmi şəkildə araşdırıldığını bildirib.
Luna açıqlamasında bildirib ki, Bosniya və Herseqovina Konsulluğu və İtaliya səfirliyi ilə əlaqə saxlanılıb, iddialara adı qarışan şəxslərlə bağlı məlumat mübadiləsi aparılır. O, ABŞ vətəndaşlarının belə hadisələrdə iştirak etmiş olması halında, həmin şəxslərin məsuliyyətə cəlb ediləcəyini vurğulayıb.
“Mülki şəxsləri, xüsusilə uşaqları vurmaq üçün pul ödəmək-ABŞ-nin dözümsüz yanaşdığı bir vəhşilikdir. İtaliya və Bosiya hökumətləri, bu hadisələrdə iştirakı ehtimal olunan amerikalılarla bağlı bütün məlumatları təqdim edəcək.”-deyə o bildirib.
İtaliyada prokurorluq Sarayevo mühasirəsi zamanı Serb snayperlərinin mövqelərinə yaxınlaşaraq “əyləncə məqsədilə” mülki vətəndaşlara atəş açdıqları iddia olunan bir qrup İtaliya vətəndaşı barədə istintaq aparır.
1992–1995-ci illər müharibəsi dövründə Sarayevoda Serb snayperlərinin mülki şəxsləri hədəf aldığına dair 2021-ci ildə yayılan yeni görüntülər Bosniya cəmiyyətində geniş rezonans doğurmuşdu. 3,5 il davam edən mühasirə zamanı 1601-i uşaq olmaqla 11 min 541 dinc sakin həlak olmuşdu.
ABŞ Konqresində başlanmış araşdırmanın nəticələri yaxın həftələrdə açıqlana bilər.