BAKI,AzerVoice

Türkiyə Prezidenti Rəcəb Tayyib Ərdoğan İstanbulda keçirilən “17-ci Beynəlxalq Müdafiə Sənayesi Sərgisi”nin (IDEF 2025) açılış mərasimində çıxış edərək, Qəzza zolağında yaşanan humanitar fəlakətə diqqət çəkib və beynəlxalq ictimaiyyəti bu vəhşiliyə səssiz qalmamağa çağırıb.

AzerVoice xəbər verir ki, Ərdoğan çıxışında bildirib ki, İsrailin Qəzzada həyata keçirdiyi hərbi əməliyyatlar nəticəsində bölgədə aclıq, səfalət və insanlıq dramı yaşanır.

“Qəzzada humanitar yardım girişlərinə icazə verilmədiyi üçün aclıqdan əziyyət çəkən uşaqların dərdi bizim dərdimizdir. Qəzzada insanlıq ölür”- deyə Ərdoğan bildirib.

Ərdoğan beynəlxalq ictimaiyyəti vahid mövqe nümayiş etdirməyə səsləyib.

“Bu vəhşiliyə qarşı birlikdə ‘Artıq yetər’ deməliyik. Əgər biri bu soyqırıma susursa, deməli, İsrailin törətdiyi insanlıq cinayətlərinə şərikdir. Mən bütün beynəlxalq ictimaiyyəti insanlıq cəbhəsində birləşməyə çağırıram”- deyə o vurğulayıb.

Türkiyə lideri diplomatik səylərin davam etdiyini də vurğulayıb və qeyd edib ki, İsrailin Suriyadakı təcavüzkar hərəkətləri də regionda sabitliyi təhdid edir. O, bölgədə sülh və rifah üçün müdafiə sənayesinin gücləndirilməsinin vacibliyini ifadə edib.

Qeyd edək ki, IDEF 2025 sərgisi 22–27 iyul tarixlərində İstanbulda keçirilir. Tədbir Milli Müdafiə Nazirliyinin ev sahibliyi, Prezidentliyə bağlı Müdafiə Sənayesi İdarəsinin dəstəyi və Türk Silahlı Qüvvələrini Gücləndirmə Fondunun rəhbərliyi ilə təşkil olunub. Sərgi dünyanın müxtəlif ölkələrindən dövlət və sənaye nümayəndələrinin iştirakı ilə keçirilir.