BAKI, AzerVoice
Türkiyənin Xarici İşlər Naziri Hakan Fidan sabah Ankarada keçiriləcək Türkiyə-İordaniya-Suriya Xarici İşlər Nazirləri Toplantısına ev sahibliyi edəcək.
AzerVoice xəbər verir ki, bu barədə Türkiyə Xarici İşlər Nazirliyi məlumat yayıb.
Məlumata görə, toplantıya İordaniyanın Xarici İşlər Naziri Əymən əs-Səfədi və Suriya Xarici İşlər Naziri Əsəd Həsən Şeybani qatılacaq.
Görüşdə bölgədəki son hadisələr və regional təhlükəsizlik müzakirə olunacaq. Hakan Fidan toplantıda, Suriya hökumətinin ölkədə təhlükəsizlik və sabitliyi gücləndirməyə yönəlmiş səylərinə Türkiyənin güclü dəstəyinin davam edəcəyini vurğulayacaq.
Toplantıda müzakirə olunacaq əsas mövzulardan biri də İsrailin Suriyaya və bölgədəki digər ölkələrə qarşı göstərdiyi aqressiv siyasət olacaq.
Fidan, bölgənin gələcəyində heç bir terror təşkilatına yer olmadığını qeyd edərək, Türkiyənin bu mövzuda qətiyyətli və prinsipial mövqe tutduğunu bəyan edəcək.
Fidan, terrorizm də daxil olmaqla ortaq problemlərin həllində “bölgə problemlərinə bölgə həlləri” prinsipinin əsas götürülməsinin vacibliyini bildirəcək və qonşu ölkələr arasında həmrəylik və əməkdaşlığın əhəmiyyətinə toxunacaq.
O, həmçinin vurğulayacaq ki, Suriya və qonşu ölkələrin terrorla mübarizədə əməkdaşlığı həm bölgə, həm də qlobal təhlükəsizlik baxımından mühüm rol oynayacaq.
Toplantı çərçivəsində Hakan Fidanın həm iordaniyalı, həm də suriyalı həmkarları ilə ikitərəfli görüşlər keçirməsi də planlaşdırılır.