BAKI, AzerVoice

Türkiyə Xarici İşlər Nazirliyi İsrailə Suriyada baş verən son hadisələrlə bağlı xəbərdarlıq edib.

AzerVoice xəbər verir ki, bu haqda Nazirliyin sözçüsü Öncü Keçelinin verdiyi açıqlamada deyilir.

"Türkiyə, Suriyanın cənubunda baş verən gərginliklərin Suriya hökuməti ilə bölgədəki yerli qüvvələr arasında dialoq və sağlam düşüncə yolu ilə sona çatdırılacağına, hadisələrdə məsuliyyəti olan şəxslərin ədalət qarşısına çıxarılacağına inanır.

Suriyanın bu kritik dövründə, başda region ölkələri olmaqla beynəlxalq ictimaiyyətin vəzifəsi ölkədə təhlükəsizlik və sabitliyin təmin olunmasına töhfə vermək və ictimai barışa yönəlmiş təşəbbüsləri dəstəkləməkdir. Bu çərçivədə, İsrailin Suriyanın birliyi və bütövlüyünə zərər verən hava hücumlarını dərhal dayandırması vacibdir" - deyə, açıqlamada qeyd olunub.

Keçeli sonda qeyd edib ki, Türkiyə, Suriya cəmiyyətini təşkil edən bütün tərəflər arasında barış və razılaşma səylərinə dəstəyini davam etdirəcək.

Qeyd edək ki, bugün İsrail Hərbi Hava Qüvvələrinin pilotsuz uçuş aparatları (PUA) Dəməşqin cənub-qərbində Suriyanın təhlükəsizlik qüvvələrini hədəf alıb. PUA-lar təhlükəsizlik qüvvələrinin toplaşdığı ərazilərə azı beş hava zərbəsi endirib.