BAKI, AzerVoice

Bu ilin yanvar–sentyabr aylarında Azərbaycan və Gürcüstan arasında ticarət dövriyyəsi artıb. Dövlət Gömrük Komitəsinin AzerVoice verdiyi məlumata görə, iki ölkə arasında ticarət əməliyyatlarının həcmi 624 milyon ABŞ dollarına çatıb ki, bu da ötən ilin eyni dövrü ilə müqayisədə 51,7 milyon dollar və ya 9 faiz çoxdur.

Hesabat dövründə Azərbaycan Gürcüstana 495,5 milyon dollar dəyərində məhsul ixrac edib. Bu göstərici əvvəlki illə müqayisədə 2 faiz artım deməkdir. Eyni zamanda, Gürcüstandan Azərbaycana idxalın həcmi əhəmiyyətli dərəcədə yüksələrək 128,5 milyon dollar təşkil edib. Artım 42,8 milyon dollar və ya 49,9 faiz olub.

Ümumilikdə, 2025-ci ilin ilk doqquz ayında Azərbaycanın xarici ticarət dövriyyəsi 35,375 milyard dollar səviyyəsində qeydə alınıb. Bunun 18,606 milyard dolları ixrac, 16,769 milyard dolları isə idxal əməliyyatlarının payına düşüb.
Ötən ilin eyni dövrü ilə müqayisədə ixracda 6,3 faiz azalma, idxalda isə 14,5 faiz artım müşahidə olunub.

Nəticədə xarici ticarətdə 1,837 milyard dollar məbləğində müsbət saldo yaranıb. Bu göstərici əvvəlki illə müqayisədə 2,8 dəfə azalaraq 3,374 milyard dollar aşağı düşüb.