BAKI, AzerVoice
ABŞ və İsrail, Yəmənin "Ənsar Allah" (husilər) hərəkatının nəzarətində olan ərazilərinə hava zərbələri endiriblər.
AzerVoice xəbər verir ki, bu barədə "Al-Masirah" telekanalı məlumat yayıb.
Məlumata görə, İsrail hərbi hava qüvvələri Qırmızı dəniz sahilində yerləşən Hudeyda limanı və husilərə məxsus ərazilərə hava zərbələri endirib. Məlumatda qeyd olunub ki, bu gün ərzində Hudeyda vilayəti azı 12 hava zərbəsinə məruz qalıb.
Xatırladaq ki, dünən Yəmən ərazisindən İsrailə raket zərbəsi endirilmişdi. Raket qalıqlarının Ben Qurion hava limanına düşdüyü bildirilmişdi. İsrailin təcili yardım xidməti hadisədə dörd nəfərin yüngül və orta dərəcədə xəsarət aldıqlarını bildirib.
İsrailin dövlət televiziyası KAN hava limanının hücum səbəbilə uçuşlara bağlandığını bildirib.
Digər tərəfdən, "Ənsar Allah" hərəkatının sözçüsü Yəhya Səriə bildirib ki, bu hücum İsrail ordusunun Qəzza zolağında həyata keçirdiyi soyqırıma qarşı Fələstin xalqına dəstək məqsədilə edilib.
Səriə bildirib ki, Ben Qurion Hava Limanına hücum hipersonik ballistik raketlə həyata keçirilib və İsrail ilə ABŞ-ın hava müdafiə sistemləri bu raketi vurmaqda aciz qalıb.
