BAKI, AzerVoice, Səməd Əyyubov
Oğul Bey bölgənin ən qabaqcıl müdafiə texnologiyaları mərkəzlərindən biri olacaq.
AzerVoice xəbər verir ki, bu fikri Türkiyə prezidenti Rəcəb Tayyib Ərdoğan səsləndirib.
“ASELSAN-a məxsus ümumi dəyəri 280 milyon dollar olan 14 mühüm obyektin rəsmi açılışını etdik. Eyni zamanda, 900 futbol meydançasından daha böyük bir ərazidə, bir milyard yarım dollarlıq sərmayə ilə inşa edilən Oğul Bey Texnologiya Mərkəzinin təməlini qoyduq. Bu strateji layihə tamamlandıqda, bölgənin ən müasir müdafiə texnologiyaları mərkəzlərindən birinə çevriləcək”, – deyə dövlət başçısı bildirib.
Ərdoğan həmçinin ASELSAN-ın Gölbaşı kompleksini ziyarət etdiyini və “Polad Günbəz” sistemlərinin ordunun istifadəsinə verildiyini xatırladıb.
“Bu il 50 illiyini qeyd edən Türkiyə müdafiə sənayesinin aparıcı qurumlarından ASELSAN-ın Gölbaşı kompleksini ziyarət etdik. Dəyəri 460 milyon dollar olan və ümumilikdə 47 vasitədən ibarət ‘Polad Günbəz’ sistemlərini ordumuzun inventarına daxil etdik”, – deyə o vurğulayıb.
Türkiyə prezidenti əlavə edib ki, ölkə “Polad Günbəz” sistemi ilə hava hücumundan müdafiə sahəsində artıq fərqli bir gücə çevrilir.