BAKI, AzerVoice, Fərid Mikayılov

Türkiyənin ədliyyə naziri Yılmaz Tunç, İstanbulun Bağcılar rayonunda keçirilən “Türkiyə Yüzyılı Buluşmaları” proqramında çıxış edərək, CHP-nin daxili çəkişmələrini sərt tənqid edib və Türkiyənin yeni konstitusiyaya ehtiyac duyduğunu bildirib.

AzerVoice xəbər verir ki, nazir çıxışında CHP-nin vəziyyətinə diqqət çəkərək, müxalifətin idarəçilik qabiliyyətinin olmadığını vurğulayıb.

“Müxalifətin içində olduğu vəziyyəti görürsünüz. Onlar Türkiyəni idarə edə bilməz. Öz içlərində davalı olan bir quruluş ölkəni idarə edə bilməz. Bunu millətimiz də görür” – deyə Tunç qeyd edib.

Tunç, AK Partinin 23 ildir xalqın etimadı ilə iqtidarda olduğunu xatırladaraq, partiyanın xalqın tələblərinə və milli iradəyə sahib çıxaraq yoluna davam etdiyini vurğulayıb.

Nazir, Rəcəb Tayyib Ərdoğanın BMT Baş Assambleyasındakı çıxışına diqqət çəkərək, İsrailin Qəzzada həyata keçirdiyi əməliyyatları “soyqrım” kimi dəyərləndirib.

Nazir çıxışında, Türkiyənin terrorla mübarizəsinin davam edəcəyini və gənclərin sülh içində yaşamasını əsas hədəf kimi göstərib. O həmçinin, pandemiya və qlobal böhranların yaratdığı iqtisadi təsirlərə baxmayaraq, iki il ərzində alım gücünün bərpa ediləcəyini vurğulayıb.