BAKI, AzerVoice, Nailə Babazadə
Türkiyənin Ətraf Mühit, Şəhərsalma və İqlim Dəyişikliyi naziri Murat Kurum, vətəndaşlara faizsiz ev, avtomobil və iş yeri əldə etmək imkanı təqdim edən yeni sistemi tanıdıb.
AzerVoice xəbər verir ki, “Emlak Katılım” dövlət qurumunun iştirakçılığı ilə həyata keçirilən bu sistem vasitəsilə, Türkiyədə ilk dəfə olaraq bir dövlət bankı maliyyələşdirmə sektoruna daxil olub.
Nazir Murat Kurum yeni sistemin ən mühüm xüsusiyyətinin faizsiz olması olduğunu vurğulayaraq, “Hər şeydən əvvəl bu sistemdə qətiyyən faiz yoxdur, birbaşa dövlət zəmanəti vardır” deyə bildirib.
Nazirin sözlərinə görə, bu sistemdə iştirakçılar Emlak Katılım zəmanəti ilə bir araya gələrək öz büdcələrinə uyğun endirimlərlə əmlak əldə edəcəklər. Layihənin əsas məqsədi vətəndaşların ən əsas ehtiyaclarından olan mənzil problemini həll etməkdir.
Kurum, vətəndaşlara iki fərqli maliyyələşdirmə modeli təqdim olunacağını açıqlayıb.
Nazir bildirib ki, sistem Emlak Konut və TOKİ ilə ortaq layihələr də həyata keçirəcək və xüsusilə İstanbulda vətəndaşlara faizsiz ev imkanları yaradacaq.
“Ardıcıl olaraq ortaya qoyduğumuz innovativ ev, iş yeri və avtomobil imkanları ilə məqsədimiz vətəndaşlarımızın rifahını, xoşbəxtliyini təmin etməkdir. İşin sonunda isə xalqımızın duasını qazanmaqdan başqa hədəfimiz yoxdur.”-deyə nazir bildirib.
