BAKI, AzerVoice, Nərmin Ağayeva

Türkiyə Xarici İşlər Nazirliyi Əfqanıstanın şərqindəki Kunar əyalətində, Cəlalabad şəhəri yaxınlığında 31 avqust gecəsi baş verən 6 bal gücündə zəlzələ ilə bağlı bəyanat yayıb.

AzerVoice xəbər verir ki, bəyanatda “Əfqanıstanda baş verən bu dəhşətli zəlzələ nəticəsində çox sayda insanın həyatını itirməsi bizi dərindən kədərləndirir. Həyatını itirənlərə Allahdan rəhmət diləyir, Əfqanıstan xalqına və onların yaxınlarına dərin hüznlə başsağlığı veririk.” - deyə bildirilib.

ABŞ Geoloji Xidməti (USGS) zəlzələnin 6 bal gücündə olduğunu və Cəlalabaddan 27 kilometr şimal-şərqdə, Əfqanıstan-Pakistan sərhədi yaxınlığında, yerin 8 kilometr dərinliyində baş verdiyini açıqlayıb. Yerli rəsmilər bu zəlzələni ölkə tarixindəki ən güclü təbii fəlakətlərdən biri kimi qiymətləndiriblər.

Əfqanıstanın müvəqqəti hökumətinin sözçüsü Zəbihullah Mücahid mətbuat konfransında zəlzələ nəticəsində ölənlərin sayının 800-ü, yaralıların sayının isə 2500-ü keçdiyini bildirib. O, həmçinin ölkənin zərər çəkmiş bölgələrində xilasetmə və yardım əməliyyatlarının davam etdiyini qeyd edib.

Qeyd edək ki, Əfqanıstanda son illərdə baş verən təbii fəlakətlər, xüsusilə zəlzələlər ölkədəki infrastrukturun zəifliyi və humanitar böhran səbəbindən böyük itkilərə səbəb olur, bu da beynəlxalq yardım təşkilatlarının dəstəyinə ehtiyacı daha da artırır.