BAKI, AzerVoice , Nərmin Ağayeva
Zəngəzur dəhlizindən təxmini 147,6 milyard lirə gəlir əldə ediləcək.
AzerVoice xəbər verir ki, Türkiyənin nəqliyyat və infrastruktur naziri Abdulkadir Uraloğlu İğdırda Qars-İğdır-Aralık-Dilucu Dəmiryolu Xəttinin təməlqoyma mərasimində jurnalistlərin suallarını cavablandırıb.
Nazir bildirib ki, Zəngəzur dəhlizi yalnız nəqliyyat marşrutu deyil, həm də strateji sərmayədir və türk dünyasını, türk cümhuriyyətlərini və Uzaq Şərqi birləşdirən ən qısa yol olacaq. Onun sözlərinə görə, dəhlizin 15 milyon ton yükdaşıma potensialı var.
“30 illik proqnoza görə, Zəngəzur dəhlizindən 135 milyard lirə əməliyyat gəliri, 3 milyard lirə qəza gəliri, 2,1 milyard lirə iqlim qənaəti, 3,5 milyard lirə isə yol və zaman qənaəti əldə ediləcək. Beləliklə, ümumilikdə 147,6 milyard lirə gəlir gözlənilir”, – Uraloğlu qeyd edib.
Nazir həmçinin Qars-İğdır-Aralık-Dilucu Dəmiryolu Xəttinin bölgə üçün yeni iqtisadi imkanlar yaradacağını, logistika, sənaye və məşğulluğun inkişafına töhfə verəcəyini vurğulayıb.
Qeyd edək ki, Türkiyə hökuməti Orta Dəhliz layihəsi çərçivəsində regionu beynəlxalq nəqliyyat və ticarət mərkəzinə çevirməyi hədəfləyir.