BAKI, AzerVoice , Nərmin Ağayeva
Türkiyə ilə Fransa arasında yaxınlaşma Yunanıstanda narahatlıq yaradıb.
AzerVoice xəbər verir ki, Yunan mətbuatı Ankara-Paris xəttində artan diplomatik təmasların və müdafiə sənayesi əməkdaşlığına dair mesajların Afinada təcrid olunma qorxusu doğurduğunu yazıb. Prezident Rəcəb Tayyib Ərdoğanın Fransa lideri Emmanuel Makronu “dəyərli dost” adlandırması və BMT sammitində planlaşdırılan görüş bu narahatlıqları daha da gücləndirib.
“Thess Today” nəşri Türkiyə və Fransanın yeni əməkdaşlıq səhifəsi açdığını, Yunanıstanın isə prosesdə passiv qaldığını vurğulayıb. Məqalədə “Bizim yalnız Rafale təyyarələrimiz qalıb. Türkiyə sahədə qalib gəlir, biz isə masada qalırıq” ifadəsi yer alıb. Digər tərəfdən, “belə davam edərsə, hətta Kipr də üzümüzü döndərə bilər” kimi qeydlər də Yunan ictimaiyyətində geniş müzakirələrə səbəb olub.
Ərdoğan son telefon danışığında Makronla Rusiya-Ukrayna müharibəsi, Qəzza böhranı və regional sabitlik məsələlərini müzakirə etdiklərini, xüsusən müdafiə sənayesi əməkdaşlığının genişləndirilməsi barədə razılığa gəldiklərini açıqlayıb.
Qeyd edək ki, iyun ayında keçirilən NATO Sammitində Yunanıstanın baş naziri Kiriakos Mitsotakisin diplomatik platformada təcrid görüntüsü diqqət çəkmiş, sosial mediada yayılan kadrlar “Yunanıstan NATO-da tək qaldı?” sualını gündəmə gətirmişdi. Bu fonunda Türkiyənin həm Avropa, həm də regional aktorlarla güclənən diplomatik təmasları Ankara ilə Afinanın mövqelərini daha da fərqləndirib.
