BAKI, AzerVoice, Nərmin Ağayeva
Türkiyə Avropa təhlükəsizliyində əsas güclərdən biridir.
AzerVoice xəbər verir ki, İsveçin Stokholm Universiteti Türkiyənin müdafiə sənayesindəki yüksəlişi və Avropa təhlükəsizlik arxitekturasındakı potensial rolu ilə bağlı yeni hesabat dərc edib. Paul T. Levin və Minna Ålander tərəfindən hazırlanan sənəd “İsveç və Finlandiyanın Türkiyənin Avropa Təhlükəsizliyindəki Roluna dair Qavrayışları” başlığı ilə təqdim olunub.
Hesabatda Avropa İttifaqının üzləşdiyi problemlər, Ukrayna müharibəsi fonunda təhlükəsizlik arxitekturasındakı dəyişikliklər və Türkiyənin bu nizamda strateji mövqeyi ətraflı şəkildə təhlil olunub. Müəlliflər qeyd ediblər ki, ABŞ-ın müttəfiq kimi artan etibarsızlığı fonunda Türkiyə Avropada hərbi və təhlükəsizlik əməkdaşlığı üçün etibarlı tərəfdaş qismində önə çıxır.
Sənəddə vurğulanır ki, Finlandiya və İsveç rəsmiləri Türkiyənin hərbi gücünü qəbul edir və Ankara ilə konstruktiv əməkdaşlığın davam etdirilməsinin vacibliyini etiraf edirlər. “Finlandiya və İsveç xarici siyasət və milli təhlükəsizlik rəsmiləri bu gün Türkiyənin bir hərbi güc olaraq əhəmiyyətini və Ankara ilə konstruktiv əlaqələrin faydalarını qəbul edirlər”, – deyə hesabatda qeyd olunub.
Təhlildə həmçinin bildirilir ki, inkişaf edən qlobal təhlükəsizlik mühitində Türkiyə ilə Aİ arasında daha geniş əməkdaşlıq imkanları mövcuddur və bu, Avropanın gələcək təhlükəsizlik arxitekturasına müsbət təsir göstərə bilər.
Qeyd edək ki, sözügedən hesabat, Rusiyanın 2022-ci ildə Ukraynaya qarşı genişmiqyaslı hərbi əməliyyatlarından sonra Avropanın təhlükəsizlik mühitindəki dəyişikliklərə dair aparılan daha geniş araşdırmaların davamı olaraq hazırlanıb.
