BAKI, AzerVoice, Nailə Babazadə
Türkiyənin Prezidenti Rəcəb Tayyib Ərdoğan və Qətər Əmiri Əmir Şeyx Təmim bin Həməd Al Tani-nin iştirakı ilə müxtəlif sahələrdə anlaşmalar və Yüksək Strateji Komitənin 11-ci Toplantısına dair Birgə Bəyanat imzalanıb.
AzerVoice xəbər verir ki, Türkiyə ilə Qətər arasında müxtəlif sahələr üzrə anlaşmalar imzalanıb.
Əmirlik Divanında keçirilən təkbətək və nümayəndə heyətləri səviyyəsində görüşlərdən sonra Rəcəb Tayyib Ərdoğan və Qətər Əmiri Şeyx Təmim bin Həməd Al Tani Türkiyə–Qətər Yüksək Strateji Komitəsinin 11-ci iclasına sədrlik ediblər.
Toplantıdan sonra Ərdoğan və Əmir Al Tani-nin iştirakı ilə iki ölkə arasında bir sıra razılaşmaların imzalanma mərasimi baş tutub.
“Türkiyə Respublikası və Qətər Dövləti arasında Yüksək Strateji Komitənin On Birinci Toplantısına dair Birgə Bəyanat” Türkiyənin Xarici İşlər Naziri Hakan Fidan və Qətərin Baş naziri, eyni zamanda Xarici İşlər Naziri Şeyx Məhəmməd bin Abdurrahman Əl Tani tərəfindən imzalanıb.
“Türkiyə Prezident Aparatının Strateji və Büdcə İdarəsi ilə Qətər Dövləti Hökuməti arasında Strateji İnkişaf Planlamasının Müxtəlif Sahələrində Əməkdaşlıq və Təcrübə Mübadiləsinə dair Anlaşma Memorandumu” Türkiyənin Xəzinə və Maliyyə Naziri Mehmet Şimşək, Ticarət Naziri Ömər Bolat və Qətər Milli Planlaşdırma Şurasının Baş katibi Əbdüləziz bin Nasir Əl Xəlifə tərəfindən imzalanıb.
“Ticarət Nazirliyi ilə Qətər Ticarət və Sənaye Nazirliyi arasında Birgə Nazirlər Bəyanatı”na isə Türkiyənin Ticarət Naziri Ömər Bolat və Qətərin Ticarət və Sənaye Naziri Şeyx Faysal bin Tani Əl Sani imza atıblar.
“Müdafiə Sənayesi Sahəsində Əməkdaşlığa dair Anlaşma Memorandumu”nu isə Türkiyənin Müdafiə Sənayesi Komitəsinin rəhbəri Haluk Görgün və Qətərin Baş nazir müavini, Müdafiə Naziri Şeyx Saud bin Abdurrahman bin Həsən bin Əli Al Sani imzalayıb.
Görüşlərdə enerji, ticarət, müdafiə sənayesi, logistika və texnoloji əməkdaşlıq kimi sahələrdə əlaqələrin daha da genişləndirilməsi razılaşdırılıb. Tərəflər qarşılıqlı investisiya təşəbbüslərinin artırılması və regionda birgə layihələrin reallaşdırılması ilə bağlı da fikir mübadiləsi aparıblar.
Prezident Ərdoğan, danışıqlardan sonra Əmir Şeyx Təmim bin Həməd Al Tani tərəfindən şərəfinə verilən rəsmi axşam yeməyinə qatılıb. Tədbir Lusail sarayında keçirilib və mətbuata qapalı olub.
Qətərdəki görüşlərini başa vuran Prezident Rəcəb Tayyib Ərdoğan, Əmirin dəvəti ilə başladığı səfərini tamamlayaraq Oman Sultanlığına yola düşüb.
Prezidenti Hamad Beynəlxalq Hava Limanından Qətərin baş nazir müavini və müdafiə naziri Şeyx Saud bin Abdurrahman bin Həsən bin Əli Al Tani, eləcə də Türkiyənin Dohadakı səfiri Mustafa Göksu və digər rəsmi şəxslər yola salıblar.
Ərdoğanla birlikdə birinci xanım Əminə Ərdoğan, eləcə də nazirlər və yüksəkvəzifəli nümayəndələr — Hakan Fidan, Alparslan Bayraktar, Mehmet Şimşek, Yaşar Güler, Mehmet Fatih Kaçır, Ömər Bolat, İbrahim Kalın, Burhaneddin Duran və digər rəsmi şəxslər də səfərdə iştirak ediblər.