BAKI, AzerVoice, Nərmin Ağayeva
Türkiyənin xarici işlər naziri Hakan Fidan, Botsvananın xarici işlər naziri Phenyo Butale ilə görüşüb.
AzerVoice xəbər verir ki, görüşdən sonra keçirilən mətbuat konfransında Fidan, Afrikadakı diplomatik şəbəkənin genişləndirilməsinə xüsusi önəm verdiklərini bildirib.
Fidan vurğulayıb ki, Botsvana Afrikada siyasi sabitliyi və iqtisadi uğurları ilə nümunəvi ölkələrdən biridir.
“Botsvana ilə əlaqələrimizi hər sahədə inkişaf etdirməkdə qətiyyətliyik. Botsvananın ölkəmizdə səfirlik açması üçün lazımi dəstəyi verməyə hazır olduğumuzu bildirdim. Təqaüd verdiyimiz Botsvanalı tələbələrin KKTC-ni seçmələrini də yüksək qiymətləndiririk.” - deyə o bildirib.
Nazir həmçinin Qəzzadakı vəziyyətə toxunaraq, atəşkəsin əsas prioritet olduğunu qeyd edib.
“Qəzzada 2 milyon insan aclıq təhlükəsi ilə üz-üzədir. İsrailin fələstinlilərə qarşı könüllü miqrasiya siyasətinə beynəlxalq ictimaiyyət tədbir görməlidir. Türkiyə olaraq bu məqsədə çatmaq üçün çalışırıq.” - deyə o bildirib.
Fidan, Türkiyənin Afrika ilə 150-yə yaxın müqavilə imzaladığını, 44 ölkədə səfirliyinin, THY-nin isə 41 Afrika ölkəsinə uçuşlar təşkil etdiyini xatırladıb.
Botsvana xarici işlər naziri Phenyo Butale isə Türkiyə ilə əməkdaşlığı genişləndirməkdə qərarlı olduqlarını bildirib.
“Türkiyənin iqtisadi inkişafı ilhamvericidir. Afrikada dayanıqlı iqtisadiyyatın qurulması üçün Türk iş adamlarını Botsvanada görmək istəyirik və onların təhlükəsizliyinə zəmanət veririk.” - deyə o bildirib.
Butale həmçinin TİKA-nın fəaliyyətini yüksək qiymətləndirərək, sülhün bərqərar olması ilə iqtisadi, sənaye və digər sahələrdə əməkdaşlığın daha da artacağını vurğulayıb.
