BAKI, AzerVoice
Baykar İtaliyanın 140 illik aviasiya nəhəngi Piaggio Aerospace-i rəsmi olaraq satın alıb.
AzerVoice xəbər verir ki, Türkiyənin
pilotsuz uçuş aparatları sahəsində lider şirkəti Baykar, İtaliyanın
tarixi aviasiya brendi Piaggio Aerospace-in satınalma prosesini
rəsmi olaraq tamamlayıb.
Bu tarixi transfer nəticəsində Piaggio obyektləri P.180 Avanti EVO
reaktivləri və Baykar-ın İHA-ları üçün Avropada strateji istehsal
bazasına çevriləcək.
Baykar və İtaliya hökuməti arasında bağlanan müqavilə İtaliyanın “Made in Italy” proqramı və “Golden Power” tənzimləmələri çərçivəsində həyata keçirilib. Satınalma mərasimi İtaliyada təşkil olunub və tədbirdə İtaliya Müəssisələr naziri Adolfo Urso, Baykar baş direktoru Haluk Bayraktar, Texnologiya rəhbəri Selçuk Bayraktar və Piaggio-nun fövqəladə komissarları iştirak ediblər.
Haluk Bayraktar bu alışın məqsədinin Piaggio Aerospace-in dərin
köklərinə söykənərək onu innovativ və güclü gələcəyə daşımaq
olduğunu bildirib. Selçuk Bayraktar isə bu addımın Türkiyə-İtaliya
sənaye əməkdaşlığının yeni mərhələsi olacağını qeyd edib.
"Biz Piaggio-nu mühəndislik mükəmməlliyi və təhlükəsizlik
prinsipləri ilə qlobal bazarın tələblərinə uyğun şəkildə
canlandıracağıq." - deyə o bildirib.
Strateji planlara əsasən:
Piaggio-nun P.180 Avanti EVO təyyarələri modernləşdirilərək yenidən qlobal bazara təqdim ediləcək,
Baykar-ın Bayraktar TB2 və AKINCI İHA-larının Avropa üçün istehsalı və texniki xidməti burada təşkil ediləcək,
İtaliyada mülki aviasiya və müdafiə sahəsində texniki xidmət mərkəzi qurulacaq.
Qeyd edək ki, Baykar 2003-cü ildən bu yana bütün layihələrini öz imkanları ilə həyata keçirir və gəlirlərinin 90%-dən çoxunu ixracdan əldə edir. Şirkət 2023 və 2024-cü illərdə 1,8 milyard dollarlıq ixrac həcmilə Türkiyənin ən çox ixrac edən ilk 10 şirkətindən biri olub.
Baykar, dünyanın ən böyük İHA ixracatçısı olaraq bu günə qədər 36 ölkə ilə müqavilə imzalayıb və Türkiyənin müdafiə və aviasiya sektorunda ixracat lideri olaraq fəaliyyətini genişləndirməkdə davam edir.
