BAKI, AzerVoice

“Türkiyənin qoruyucu ailə modeli dünyaya nümunədir”

AzerVoice xəbər verir ki, Ailə və Sosial Xidmətlər Naziri Mahinur Özdemir Göktaş, Antalya Diplomatiya Forumunda çıxışı zamanı Türkiyənin qoruyucu ailə modelinin BMT-nin Uşaq Fondu (UNICEF) tərəfindən nümunəvi təcrübə kimi tanındığını bildirib.

Nazir qeyd edib ki, bu model dövlət himayəsində olan uşaqların sevgi dolu ailə mühitində böyüməsinə şərait yaradır və hazırda UNICEF-in yaxşı təcrübələr siyahısında yer alır. Türkiyənin təşəbbüsü ilə bu model artıq Azərbaycanda tətbiq olunur, Özbəkistanda isə uyğunlaşdırma işlərinə başlanılıb.

Göktaş, hazırda 15 minə yaxın uşağın dövlət himayəsində olduğunu və 10 min 558 uşağın qoruyucu ailələrə verildiyini bildirib. Onun sözlərinə görə, xüsusilə 0-6 yaş arası uşaqlar ailə mühitində böyüdükdə onların psixoloji və fiziki inkişafı müsbət şəkildə dəyişir.

Qeyd edək ki, qoruyucu ailə sistemi 2002-ci ildə cəmi 515 uşağı əhatə edirdisə, bu rəqəm hazırda on minlərlə uşağa çatıb. Nazirlik, bu ailələrə dəstək verir və uşaqların daha fərdi, ev şəraitinə uyğunlaşdırılmış mühitdə böyüməsi üçün müəssisələrdə ev tipli model tətbiq edir.