BAKI, AzerVoice, Nailə Babazadə

Yanvarın 12-dən 15-dək Avstriyanın paytaxtı Vyanada keçiriləcək Türk Həftəsi Türk Dövlətləri Təşkilatına (TDT) üzv ölkələri, beynəlxalq qurumları və diplomatik missiyaları bir araya gətirərək Türk Dünyasının qlobal nüfuzunu nümayiş etdirəcək.

AzerVoice xəbər verir ki, proqram Birləşmiş Millətlər Təşkilatının (BMT) Vyana ofisində təşkil olunacaq “İpək Yolunda Türk Dünyası” adlı fotoqrafiya sərgisi başlayacaq. Türk Akademiyası və TDT-nin əməkdaşlığı ilə keçirilən bu sərgi ortaq tarixi mirası və qlobal əlaqələrdəki köklü rolu əks etdirəcək.

Həftənin ən mühüm tədbirlərindən biri “İpək Yolundan Orta Dəhlizə: Nəqliyyat və ticarətin asanlaşdırılması vasitəsilə bağlılığın təşviqi” mövzusunda keçiriləcək yüksək səviyyəli dəyirmi masa toplantısı olacaq. Bu görüşdə Şərq-Qərb nəqliyyat dəhlizinin strateji əhəmiyyəti, ticarət əlaqələrinin asanlaşdırılması və beynəlxalq təşkilatlarla əməkdaşlıq məsələləri müzakirə ediləcək.

Tədbirlər çərçivəsində Avropadakı Türk diaspor təşkilatlarının nümayəndələri üçün "Diaspor Potensialının İnkişafı" təlim proqramı da təşkil olunacaq. Bu proqramın əsas məqsədi qurumlararası koordinasiyanı və xalqlar arasındakı bağları daha da möhkəmləndirməkdir. Həmçinin Türk Dünyasının musiqi zənginliyini nümayiş etdirən incəsənət ustalarının iştirakı ilə möhtəşəm qala konsertin keçirilməsi planlaşdırılır.

Türk Həftəsi ərzində TDT-nin Baş katibi Kubanıçbek Ömüralıyevin Vyanada yerləşən beynəlxalq təşkilatların rəhbərləri ilə bir sıra ikitərəfli görüşlər keçirməsi nəzərdə tutulur. Təşkilatdan verilən məlumata görə, bu həftə Türk Dünyasının strateji hədəflərinin və əməkdaşlıq gündəminin beynəlxalq platformada tanıdılması üçün mühüm fürsət yaradacaq.