BAKI, AzerVoice, Nailə Babazadə
Ticarət naziri Ömər Bolat iyul ayında ixracın idxalı qarşılama nisbətinin son 9 ayın ən yüksək səviyyəsinə – 79,5 faizə çatdığını bildirərək, “Artan mal və xidmət ixracatı ilə iyul ayında cari əməliyyatlar balansında müsbət saldo gözlənilir,” – deyə qeyd edib.
AzerVoice xəbər verir ki, nazir Bolat NSosyal sosial şəbəkəsində Türkiyə Statistika Təşkilatı (TÜİK) tərəfindən açıqlanan iyul ayına dair xarici ticarət statistikalarını dəyərləndirib.
Bolat, iyulda ixracın 24,9 milyard dollar ilə cumhuriyyət tarixinin ən yüksək aylıq göstəricisinə çatdığını, illikləşdirilmiş ixracın isə bütün dövrlərin ən yüksək səviyyəsi olan 269,4 milyard dollara yüksəldiyini bildirib.
O, 2025-ci ilin ilk 7 ayının 6-sında aylıq mal ixracında artım əldə edildiyini vurğulayıb.
Bolat qeyd edib ki, yanvar-iyul dövründə ixrac ötən ilin eyni dövrü ilə müqayisədə 5,1 faiz artaraq 156,3 milyard dollar olub. Həmin dövrdə idxal isə 6,9 faiz artaraq 212,2 milyard dollar təşkil edib.
O, iyul ayında idxalın 5,4 faiz artaraq 31,4 milyard dollar olduğunu bildirərək əlavə edib ki, bu ayda illikləşdirilmiş idxal ötən ilin eyni ayına nisbətən 14 milyard dollar artaraq 357,7 milyard dollar olub.
Xarici ticarət kəsiri iyul ayında 11,8 faiz azalaraq 6,4 milyard dollara düşüb. Yanvar-iyul dövründə isə kəsir ötən ilin eyni dövrü ilə müqayisədə 12,2 faiz artaraq 55,9 milyard dollar təşkil edib.
Bolat həmçinin bildirib ki, illikləşdirilmiş xarici ticarət kəsiri ötən ilin eyni ayına görə 6 milyard dollar artaraq 88,3 milyard dollar olub.
“Avropa İttifaqı 27 ölkəsinin illikləşdirilmiş idxalının hələ də sabit qaldığı, xarici tələbin zəif olduğu, yaxın coğrafiyamızda davam edən müharibələr, daxili qarışıqlıqlar və gərginliklər, həmçinin tarif artımlarının yaratdığı qeyri-müəyyənliklər kimi çətin rəqabət şəraitinə baxmayaraq ixracatımızda artım davam edir. Ticarət Nazirliyi olaraq ixracatçılarımıza təqdim etdiyimiz dəstək və həyata keçirdiyimiz ticarət diplomatiyası fəaliyyətləri nəticəsində əldə edilən uğurlar istehsal və məşğulluq baxımından da müsbət nəticələr verir.” -