BAKI, AzerVoice

“Ən-Nəsr” klubunun ulduz futbolçusu Kriştianu Ronaldu, Ər-Riyadda keçirilən qlobal “Turays” forumunda çıxış edərək özünü səudiyyəli hesab etdiyini və Səudiyyə Ərəbistanının idman və turizm sahəsindəki inkişafından qürur duyduğunu bildirib. Bu haqda AzerVoice, ArabiToday saytına istinadən məlumat verir.

“Artıq üç ildir Səudiyyə Ərəbistanında yaşayıram və deyə bilərəm ki, mən sizin birinizəm. Mən bu ölkənin layihəsinə, insanlarına və futboluna inanıram. Səudiyyə liqasının həm bu günü, həm də gələcəyi çox parlaqdır.” - forumda çıxış edən 39 yaşlı portuqaliyalı ulduz deyib.

Ronaldu qeyd edib ki, Səudiyyə liqası son illərdə böyük inkişaf yoluna çıxıb, azarkeşlərin futbola olan sevgisi isə onu heyran edib.

“Son üç ildə liqa inanılmaz dərəcədə böyüyüb. Səudiyyəlilərin futbola olan ehtirası heyrətamizdir. Turizm də eyni tempdə inkişaf edir və mən bu prosesin bir hissəsiyəm. Mən səudiyyəlilərə hər zaman deyirəm: mən sizdən biriyəm, mən səudiyyəliyəm.” - deyə o bildirib.

Futbolçu 2034-cü il dünya çempionatının Səudiyyə Ərəbistanında keçiriləcəyi barədə danışaraq bildirib.

“Mən portuqaliyalıyam, 2030-cu il mundialı bizdə keçiriləcək, amma 2034-cü ildə dünya Səudiyyəni görəcək. Mən artıq bu ölkəyə mənsubam - o, mənim qəlbimdədir.” - deyə, Ronaldu əlavə edib.

O qeyd edib ki, Səudiyyənin idman strategiyasının bir hissəsi olmaq və ölkənin futbolunu dünyada tanıtmaq istəyir.

“Mən bu böyük layihənin bir parçası olmağa hazıram. Onlar mənə güvənə bilərlər , mən futbolun inkişafı və gənclərin bu oyunu sevməsi üçün daim onların yanında olacağam.” - deyə, ulduz futbolçu deyib.