BAKI, AzerVoice, Səməd Əyyubov
Amerikalı boksçu Terens Krouford 76,2 kiloqramadək çəki dərəcəsində boks üzrə mütləq dünya çempionu titulunu qazanıb.
AzerVoice-un məlumatına görə, ABŞ-ın Nevada ştatının Las-Veqas şəhərində keçirilən 12 raundlu döyüşdə o, meksikalı Saul Alvarezi hakimlərin yekdil qərarı ilə məğlub edib.
Görüşü 70 min 482 tamaşaçı izləyib ki, bu da "Allegiant" stadionunda yeni rekord göstərici olub.
Bütün hakimlər qələbəni 115:113, 115:113 və 116:112 hesabı ilə Krouforda veriblər.
Qeyd edək ki, 37 yaşlı Krouford Dünya Boks Şurası (WBC), Dünya Boks Assosiasiyası (WBA), Dünya Boks Təşkilatı (WBO) və Beynəlxalq Boks Federasiyası (IBF) üzrə dünya çempionu titullarını qazanıb. Ona həmçinin WBC tərəfindən tarixdə ilk dəfə dünya çempionu üzüyü təqdim olunub. Kroufordun aktivində 42 qələbə (31-i nokautla) var. O, hazırkı dünya çempionları arasında ən uzun qələbə seriyasının sahibidir. Krouford həm də tarixdə ilk dəfə üç fərqli çəki dərəcəsində mütləq dünya çempionu titulunu qazanan boksçu kimi adını yazdırıb.
