BAKI,AzerVoice, Fərid Mikayılov

Hazırda Fənərbaxçanı çalışdıran məşhur portuqaliyalı mütəxəssis Joze Mourinyo milli komanda ilə bağlı iddialı açıqlama verib.

AzerVoice xəbər verir ki, təcrübəli məşqçi, Dünya Çempionatında Portuqaliya yığmasının sükanı arxasında dayanmağın onun taleyi olduğunu bildirib.

“2004-cü ildən bəri Portuqaliyadan kənardayam və hesab edirəm ki, vətənim mənim başqa bir milli komandanı çalışdırmağımı qəbul etməz. Mənim taleyim Portuqaliya ilə Dünya Çempionatında iştirak etməkdir. İlk təcrübəm öz millimlə olmalıdır. Sonrasında isə peşəkarlıq baxımından digər komandaları da çalışdıra bilərəm, amma yalnız mənə bağlılıq hissi yaratdığı ölkələri – Braziliya, İngiltərə və İtaliya kimi. Amma birinci milli təcrübəm mütləq Portuqaliya ilə olacaq”- deyə o bildirib.

Xatırladaq ki, hazırda Portuqaliyanın baş məşqçisi Roberto Martinesdir və o, komandanı bu yay Millətlər Liqasında qələbəyə daşıyıb. Lakin mediada Martinesin postunu Mourinyoya təhvil verə biləcəyi barədə ehtimallar gündəmdədir. Portuqaliya sentyabrda 2026-cı il Dünya Çempionatının seçmə mərhələsində Ermənistan və Macarıstana qarşı oyunlara çıxacaq.

Digər tərəfdən, Mourinyo hələlik klub karyerasını davam etdirir. Onun rəhbərlik etdiyi Fənərbaxça hazırda Çempionlar Liqasına vəsiqə qazanmaq uğrunda mübarizə aparır.