BAKI, AzerVoice
Tovuz şəhərində fəaliyyət göstərən “022” dönər evində baş verən kütləvi zəhərlənmə hadisəsində xəstəxanaya yerləşdirilənlərin sayı 36 nəfərə çatıb.
AzerVoice xəbər verir ki, Azərbaycan Respublikasının Qida Təhlükəsizliyi Agentliyi (AQTA) və TƏBİB-in verdiyi məlumata görə, zəhərlənmə şübhəsi ilə Tovuz Rayon Mərkəzi Xəstəxanasının Təcili və Təxirəsalınmaz Tibbi Yardım şöbəsinə aparılan şəxslərin hamısına zəruri tibbi yardım göstərilib. Onların vəziyyəti hazırda stabil qiymətləndirilir və müalicələri davam etdirilir.
Hadisənin təfərrüatları
İlkin məlumatlara əsasən, zəhərlənmə hadisəsi dünən saat 16:55 radələrində qeydə alınıb. Əvvəlcə 14 nəfər (7-si kişi, 7-si qadın), daha sonra bu say sürətlə artaraq 20-yə, 28-ə və nəhayət 36 nəfərə çatıb.
AQTA bildirib ki, baş verən hadisə ilə əlaqədar qurumun mütəxəssisləri digər aidiyyəti qurumların əməkdaşları ilə birlikdə araşdırmalara başlayıb. Araşdırmalar zamanı qida nümunələri götürülərək laboratoriyaya göndərilib, müəssisənin fəaliyyəti isə müvəqqəti olaraq dayandırılıb.
Agentliyin yaydığı bəyanatda qeyd olunur ki, “Tovuz şəhəri, M.Ə.Sabir küçəsində yerləşən “022” dönər evində baş verən hadisənin səbəblərinin müəyyənləşdirilməsi üçün laborator müayinələr aparılır. İctimai iaşə müəssisəsinin fəaliyyəti müvəqqəti olaraq məhdudlaşdırılıb. Nəticələrlə bağlı ictimaiyyətə əlavə məlumat veriləcək.”
TƏBİB isə bildirib ki, hospitalizasiya edilən bütün şəxslərə ilkin tibbi yardım göstərilib və vəziyyətləri hazırda nəzarət altındadır.
