BAKI,AzerVoice, Fərid Mİkayılov

Qazaxıstanda uzunmüddətli rəqəmsal aktivlərə sərmayə yatırmaq məqsədilə yaradılan Alem Crypto Fund fəaliyyətə başlayıb.

AzerVoice xəbər verir ki, yeni kriptofond, Qazaxıstan Süni İntellekt və Rəqəmsal İnkişaf Nazirliyinin təşəbbüsü ilə Qazaqstan Venture Group tərəfindən idarə olunacaq.

Fondun əsas missiyası rəqəmsal aktivlərə uzunmüddətli sərmayə yatırmaq və kriptoehtiyatların formalaşdırılmasıdır. Rəsmi açıqlamalara görə, gələcəkdə Alem Crypto Fund dövlət yığımlarının idarə edilməsində də istifadə edilə bilər.

Qazaxıstanın Baş nazirinin müavini, Süni İntellekt və Rəqəmsal İnkişaf naziri Jaslan Madiyev fondun əhəmiyyətini belə dəyərləndirib:

“Alem Crypto Fund-un yaradılması rəqəmsal maliyyənin inkişafı istiqamətində mühüm addımdır. Məqsədimiz fondu iri investorlar üçün etibarlı alətə çevirmək və gələcək dövlət ehtiyatlarının formalaşdırılmasında əsas baza yaratmaqdır”- deyə o bildirib.

Fondun strateji tərəfdaşı Binance Kazakhstan olub. Dünyanın ən böyük rəqəmsal aktiv ekosistemlərindən biri olan Binance-in Qazaxıstandakı lisenziyalı nümayəndəliyi fondun inkişafında iştirak edəcək.