BAKI, AzerVoice

İngiltərə hökuməti, 16 yaşadək uşaqları ekran asılılığından və zərərli onlayn məzmunlardan qorumaq məqsədilə sosial media istifadəsinə gündəlik iki saatlıq limit və gecə istifadəsinə məhdudiyyət tətbiq etməyi planlaşdırır.

AzerVoice xəbər verir ki, təklif olunan tənzimləmə, həm uşaqların psixoloji sağlamlığını qorumaq, həm də ailə içi ünsiyyətin gücləndirilməsini hədəfləyir.

Texnologiya naziri Piter Kayl məsələ ilə bağlı açıqlamasında bildirib ki, hökumət uşaqların "nəzarətsiz onlayn davranışlarının" qarşısını almaq niyyətindədir.

“Uşaqların internetdə keçirdiyi vaxtı daha sağlam və nəzarətli formaya salmaq istəyirik” – deyə nazir qeyd edib.

Yeni məhdudiyyətlərə dair müzakirələr cəmiyyətdə dəstək tapıb. Bəzi valideynlər uşaqların psixoloji və sinir sistemlərinin hələ formalaşmadığını vurğulayaraq, onların zərərli məzmunlara məruz qalmasının uzunmüddətli təsirlərə səbəb ola biləcəyini bildiriblər.

İngiltərə Parlamentinin Təhsil Komitəsinin yaydığı statistikaya görə, COVID-19 pandemiyası dövründə uşaqların ekran qarşısında keçirdiyi vaxt 52 faiz artıb. Bu artım sosial mediaya məhdudiyyətlərə dair müzakirələri aktuallaşdırıb.

Eyni zamanda, ölkədə uşaqların onlayn təhlükəsizliyini artırmaq üçün hüquqi baza da gücləndirilib. İngiltərə media nəzarət orqanı Ofcom tərəfindən hazırlanan yeni tənzimləmələrə əsasən, sosial media platformaları alqoritmlərini uşaqlara zərərli məzmunların yayılmasının qarşısını alacaq şəkildə tənzimləməli olacaqlar.