BAKI,AzerVoice

SpaceX-in Starship raketi yenidən havada parçalanıb.

AzerVoice xəbər verir ki, İlon Maska məxsus SpaceX şirkətinin hazırladığı və dünyanın ən güclü kosmik raketi sayılan “Starship”in 9-cu sınaq uçuşu uğursuzluqla nəticələnib.

Raket orbitə 8 ədəd “Starlink” peyki daşısa da, yük qapağının açılmaması və yanacaq sızması səbəbindən peyklər yerləşdirilə bilməyib.

ABŞ-ın Texas ştatındakı “Starbase” bazasından havaya qalxan Starship raketi uğurla buraxılsa da, uçuşdan 30 dəqiqə sonra SpaceX raketlə əlaqənin kəsildiyini açıqlayıb. Bildirilib ki, yanacaq sistemində baş verən sızma səbəbindən raket hündürlükdə sabitliyini itirib və tez və plansız şəkildə parçalanıb.

Xatırladaq ki, bu, Starship raketinin ardıcıl ikinci uğursuz sınağıdır. Daha əvvəlki – 7-ci və 8-ci uçuşlarda da raket havaya qalxdıqdan sonra təxminən 10 dəqiqə ərzində parçalanmışdı. Hər üç sınaqda “Super Heavy” gücləndirici mərhələsi planlaşdırıldığı kimi okeana eniş etsə də, əsas raket mərhələsində texniki nasazlıqlar baş verib.

SpaceX-dən verilən açıqlamada, bu tip sınaqlardan əldə edilən təcrübənin raketin etibarlılığını artırmaqda mühüm rol oynadığı vurğulanıb.

Qeyd edək ki, 122 metr uzunluğundakı Starship raketi Yer orbitinə, Aya və Marsa yük və insan daşımaq üçün nəzərdə tutulub və hal-hazırda dünyanın ən güclü kosmik raketi hesab olunur.