BAKI,AzerVoice

Avropa İttifaqı Komissiyası rəqəmsal bazar qaydalarını pozduqlarına görə texnologiya nəhəngləri Apple və Meta şirkətlərinə ümumilikdə 700 milyon avro cərimə tətbiq edib.

AzerVoice xəbər verir ki, komissiyanın yaydığı rəsmi açıqlamaya görə, Apple-a 500 milyon, Meta-ya isə 200 milyon avro cərimə kəsilib.

Cəzanın səbəbi hər iki şirkətin “Rəqəmsal Bazarlar Qanunu” çərçivəsində müəyyən edilmiş öhdəliklərə əməl etməməsidir.

Apple şirkəti, App Store vasitəsilə tətbiqlərini təqdim edən tərtibatçıların müştəriləri alternativ xidmətlər barədə məlumatlandırmasına imkan vermədiyi üçün qanunu pozmaqda günahlandırılıb. Aİ Komissiyası Apple-ın bu məhdudiyyətləri aradan qaldırması barədə əmr verib.

Meta şirkəti isə “ödə və ya razılaş” adlı abunə modelinə görə cəzalandırılıb. 2023-cü ildə tətbiq edilən bu model çərçivəsində istifadəçilərə Feysbuk və İnstaqramı reklamsız istifadə etmək üçün aylıq ödəniş etmələri və ya şəxsi məlumatlarının istifadəsinə razılıq vermələri təklif olunub. Komissiya bu praktikanı qanunsuz sayaraq Meta-ya 200 milyon avro cərimə tətbiq edib.

Açıqlamada qeyd olunub ki, Apple və Meta Komissiyanın qərarlarına riayət etməlidirlər. Əks halda, mütəmadi cərimələrlə üzləşə bilərlər.