BAKI,AzerVoice, Orxan Qədirzadə

Səudiyyə Ərəbistanı İbrahim razılaşmalarına qoşulmaq üçün ABŞ-la aparılan diplomatik danışıqlarda müstəqil Fələstin dövlətinin yaradılması məsələsini əsas şərt kimi irəli sürüb.

AzerVoice xəbər verir ki, bu barədə məlumat İsrail mətbuatında yer alıb. Məlumatlara görə, Vəliəhd Şahzadə Məhəmməd bin Salman Vaşinqtondakı görüşlərdə ABŞ-dan iki dövlətli həll üzrə konkret yol xəritəsi və prosesin beş il ərzində tamamlanmasına dair təminat istəyib, lakin Səudiyyə və ABŞ rəsmiləri iddia ilə bağlı hələlik rəsmi açıqlama verməyiblər.

Bin Salman Ağ Evdə ABŞ Prezidenti Donald Tramp ilə görüşündə Krallığın İsrail ilə münasibətləri normallaşdırmağa hazır olduğunu, lakin bunun yalnız iki dövlətli həllin təmin edilməsindən sonra mümkün olacağını deyib:

“İbrahim razılaşmalarına qoşulmaq istəyirik, lakin iki dövlətli həllə aparan aydın yolu təmin etdiyimizdən əmin olmalıyıq.”- Salman deyib.

İsraildə bir sıra siyasi dairələr bu şərtlə normallaşmaya qarşı çıxır. Xüsusilə maliyyə naziri Bezalel Smotriç Fələstin dövlətinin yaradılması şərti ilə aparılacaq danışıqları rədd etdiyini bəyan edib.

FQeyd edək ki, İbrahim razılaşmaları 2020-ci ildə imzalanaraq İsrailin BƏƏ, Bəhreyn, Mərakeş və Sudanla münasibətlərini normallaşdırmasına imkan verib. Səudiyyə Ərəbistanı rəsmi olaraq razılaşmaya qoşulmasa da, ABŞ hökuməti prosesi genişləndirməyə çalışır.