BAKI,AzerVoice, Orxan Qədirzadə
ABŞ Prezidenti Donald Tramp Ağ Evdə Səudiyyə Ərəbistanının Vəliəhd Şahzadəsi və Baş naziri Məhəmməd bin Salmanla görüşüb. Səfər Səudiyyə-ABŞ münasibətlərində yeni mərhələ kimi qiymətləndirilir və iki ölkə arasında müdafiə, nüvə enerjisi, texnologiya və investisiya sahələrində genişmiqyaslı əməkdaşlığı əhatə edir.
AzerVoice xarici KİV-lərə istinadən xəbər verir ki, görüş zamanı Tramp Məhəmməd bin Salman barəsində “uzun illərdir yaxın dostumuzdur” deyərək onu Ağ Evdə qəbul etməyin “şərəf” olduğunu bildirib. O, Səudiyyə Ərəbistanını ABŞ-nin güclü müttəfiqi kimi qiymətləndirib və Kral Salmana hörmətini ifadə edib.
Mətbuat brifinqində Vəliəhd Şahzadə 600 milyard dollarlıq sərmayə planının 1 trilyon dollara qədər artırılacağını bildirib.
“Biz bu 600 milyard dolları demək olar ki, 1 trilyon dollara qədər yüksəldirik.”-Vəliəhd deyib.
Görüşdə regionun müdafiə gündəliyi də müzakirə olunub. ABŞ-nin Səudiyyə Ərəbistanına F-35 qırıcı təyyarələri satmaq niyyətində olduğu bildirilib. Hazırda bu təyyarələr Yaxın Şərqdə yalnız İsrailin istifadəsindədir. Tramp proseslə bağlı “məncə hər ikisi ən yüksək səviyyəli F-35-lərə sahib olmalıdır,” - deyib.
Bu addım ABŞ-nin regional silah ixrac siyasətində mühüm dəyişiklik kimi qiymətləndirilir.
Danışıqların əsas siyasi mövzularından biri Səudiyyə-İsrail münasibətlərinin gələcəyi olub. Məhəmməd bin Salman normallaşmaya hazır olduqlarını, lakin ilk növbədə Fələstin dövlətçiliyi üçün aydın yol xəritəsinin təmin edilməli olduğunu deyib.
“İbrahim Sazişlərinin bir hissəsi olmaq istəyirik. Amma iki dövlətli həll üçün açıq yol təmin edilməlidir.”- Salman deyib.
Səudiyyə Ərəbistanı Fələstin məsələsində mövqeyinin dəyişmədiyini və normallaşma üçün 1967 sərhədləri daxilində müstəqil dövlət tələbinin qüvvədə qaldığını bildirib.
Səfər həmçinin iqtisadi əməkdaşlığın genişləndirilməsinə həsr edilib. Səudiyyə Ərəbistanının Vision 2030 proqramı çərçivəsində texnologiya, idman, mədəniyyət və turizm kimi sahələrdə ABŞ şirkətləri ilə əməkdaşlıq dərinləşdirilir.
Əməkdaşlıq çərçivəsinin elan ediləcəyi əsas tədbir çərşənbə günü Kennedi Mərkəzində keçiriləcək böyük investisiya sammiti olacaq. Tədbirdə Salesforce, Qualcomm, Pfizer, Chevron, Cleveland Clinic və Aramco kimi şirkət rəhbərlərinin iştirakı gözlənilir.
Bu sammit çərçivəsində yeni müqavilələrin imzalanacağı istisna edilmir.