BAKI, AzerVoice, Fərid Mikayılov
ABŞ Silahlı Qüvvələri Venesuela sahilləri yaxınlığında narkotik qaçaqmalçılığı ilə əlaqəsi olduğu iddia edilən bir qayığı hədəfə alıb.
AzerVoice xəbər verir ki, hücum nəticəsində altı nəfər həlak olub, bununla da ABŞ-ın son aylarda bölgədə həyata keçirdiyi əməliyyatlarda ölənlərin ümumi sayı 27 nəfərə çatıb.
ABŞ Prezidenti Donald Tramp “Truth Social” platformasında paylaşdığı açıqlamada hücumu təsdiqləyib. O bildirib ki, əməliyyatın həyata keçirilməsi barədə əmri müdafiə naziri Pit Hegset verib.
Trampın sözlərinə görə, kəşfiyyat məlumatları qayığın “narkotik qaçaqmalçılığı və beynəlxalq narko-terror şəbəkələri ilə əlaqəsi olduğunu” göstərib. Lakin bu iddianı təsdiqləyən heç bir sübut təqdim olunmayıb.
Prezident paylaşımına hadisəyə aid video da əlavə edib. Kadrda kiçik bir qayığın raket zərbəsi nəticəsində partladığı əks olunub.
ABŞ rəsmiləri ölənlərin kimliyi, daşıdıqları yük və qayığın istiqaməti barədə məlumat verməyiblər.
Kongresə sızan sənədlərdə ABŞ hökumətinin bu əməliyyatları “beynəlxalq xarakter daşımayan silahlı toqquşmalar” kimi qiymətləndirdiyi bildirilir.
Keçən həftə Senatda bu tip hücumların Konqresin təsdiqi olmadan keçirilməsini qadağan edən qanun layihəsi səsverməyə çıxarılsa da, kifayət qədər səs toplanmadığı üçün qəbul edilməyib.
Kaliforniyalı demokrat senator Adam Şiff X platformasında paylaşdığı açıqlamada xəbərdarlıq edib:
“İndiyədək 27 nəfərin öldüyü bu əməliyyatlar ABŞ-ı genişmiqyaslı hərbi toqquşmaya sürükləyə bilər.”
2018–2023-cü illərdə ABŞ-ın Venesuela üzrə nümayəndəsi olmuş səfir Ceyms Stori, bu əməliyyatların əks-təsir yarada biləcəyini bildirib:
“Bu hücumlar Kolumbiya kimi müttəfiq ölkələrdən kəşfiyyat məlumatı toplama imkanlarımızı zəiflədir,” – deyə o vurğulayıb.
Stori əlavə edib ki, bu vəziyyət beynəlxalq hüququn pozulması kimi qiymətləndirilə bilər və ABŞ-ın bölgədəki diplomatik əməkdaşlığını zəiflədir.
Tramp administrasiyasının üzvləri, o cümlədən vitse-prezident Cey Di Vens, bu əməliyyatların “məhkəməsiz edam” kimi xarakterizə edilməsini rədd ediblər. Rəsmi açıqlamalarda qeyd olunur ki, bu əməliyyatlar “narkotik ticarətinə qarşı qanuni müdafiə tədbirləri” çərçivəsində həyata keçirilir.
ABŞ-ın bölgədəki ilk hücumu 2 sentyabrda baş verib və nəticədə 11 nəfər ölüb. Sonrakı hücumlar 15 sentyabr, 19 sentyabr və 3 oktyabr tarixlərində reallaşdırılıb.
Venesuela Prezidenti Nikolas Maduro Vaşinqtonu Karib dənizində hərbi varlığını artıraraq onu devirməyə çalışmaqda ittiham edir. ABŞ isə Maduro-nu narkotik ticarəti ilə əlaqədə suçlayır.
Vaşinqton avqust ayında Maduro haqqında məlumat verən şəxs üçün 50 milyon dollarlıq mükafat təyin edib.