BAKI,AzerVoice, Fərid Mikayılov

İranın xarici işlər naziri Abbas Əraqçi, BMT Baş Assambleyasının 80-ci sessiyası çərçivəsində Çinin, Rusiyanın və Pakistanın XİN rəhbərləri ilə Əfqanıstan mövzusunda keçirilən dördtərəfli görüşdə ABŞ və NATO-nu regiondakı problemlərin əsas məsuliyyət daşıyıcıları kimi göstərib.

AzerVoice xəbər verir ki, Əraqçi çıxışında bildirib ki, ABŞ-ın iki onillik davam edən hərbi iştirakı Əfqanıstana “faciə və qeyri-sabitlikdən başqa heç nə gətirməyib”. Onun sözlərinə görə, bu müddətdə minlərlə insan həyatını itirib, terrorçuluq, narkotik dövriyyəsi, korrupsiya, yoxsulluq və qaçqınlıq halları daha da dərinləşib.

“2021-ci ildəki çıxış məsuliyyətin sonu deyil, əksinə, biabırçı bir geri çəkilmə idi və onun nəticələri hələ də region ölkələrinin üzərinə düşür” – deyə o qeyd edib.

İranlı diplomat Əfqanıstana tətbiq olunan sanksiyaları tənqid edərək, onların ölkənin iqtisadi bərpasını əngəllədiyini vurğulayıb.

“Əfqanıstanın dondurulmuş aktivləri qeyd-şərtsiz azad edilməli, bu vəsaitlər ölkənin iqtisadi sabitliyinin bərpasına və əhalinin rifahına yönləndirilməlidir”- deyə Əraqçi bildirib.

Nazir, İŞİD-lə mübarizədə müəyyən irəliləyişlərə baxmayaraq, digər ekstremist və terror qruplarının hələ də Əfqanıstanda mövcudluğunu region üçün ciddi təhlükə adlandırıb. O, müvəqqəti hökuməti “bütün terror təhdidlərinə qarşı şəffaf, yoxlanıla bilən və qəti tədbirlər” görməyə çağırıb.