BAKI,AzerVoice, Fərid Mikayılov
Boeing, ABŞ Hava Qüvvələri üçün altıncı nəsil qırıcı F-47-nin istehsalına start verib.
AzerVoice xəbər verir ki, ilk uçuşun 2028-ci ildə keçirilməsi planlaşdırılır.
ABŞ Hava Qüvvələri ən azı 185 ədəd F-47 tədarük etməyi nəzərdə tutur.
ABŞ Hava Qüvvələri Komandanı David Allvin, Air & Space Forces Association-un 2025 Hava, Kosmos və Kiber Konfransında çıxış edərək F-47 proqramı ilə bağlı məlumat verib. O xatırladıb ki, mart ayında ABŞ Prezidenti Donald Tramp, Yeni Nəsil Hava Hakimiyyəti (NGAD) proqramının insanlı qırıcı komponentini istehsal etmək üzrə tenderdə qalibin Boeing olduğunu açıqlamışdı.
Allvin bildirib ki, ilk prototip artıq istehsal xəttinə çıxarılıb.
ABŞ Hava Qüvvələri daha əvvəl bəyan etmişdi ki, F-47-nin ilk uçuşu Trampın vəzifə müddəti (20 yanvar 2029) başa çatmadan həyata keçiriləcək. Proqram çərçivəsində gizli prototip sınaqları da davam etdirilir.
Proqramın detalları məxfi saxlanılır. İndiyədək yalnız iki rəsmi şəkil yayımlanıb, lakin onların təyyarənin son dizaynını əks etdirmədiyi bildirilir.
Martdan bəri fotolarda görünən kanard tipli ön qanadçıq elementləri hərbi ekspertlər arasında mübahisə doğurub. Onların manevr qabiliyyətini artıracağı, lakin radar görünməzliyinə mənfi təsir göstərə biləcəyi qeyd olunur.
ABŞ Hava Qüvvələrinin açıqlamasına görə, F-47-nin döyüş radiusu min dəniz milindən (təqribən 1850 km) çox olacaq, sürəti isə Mach 2-dən yuxarı çatacaq. Bu, mövcud qırıcılarla müqayisədə ən azı 25 faiz daha geniş əməliyyat imkanları deməkdir.
Boeing, Donanmanın F/A-XX proqramında da iştirak edir və St. Louis-dəki zavodlarını altıncı nəsil istehsal üçün genişləndirib.
F-47-nin birim qiymətinin təxminən 300 milyon dolları keçəcəyi bildirilir — bu, F-35 qırıcılarının orta dəyərindən üç dəfə baha hesab olunur. ABŞ Hava Qüvvələri isə bu təyyarəni xüsusilə Çinlə mümkün yüksək intensivlikli münaqişələrdə Pasifik bölgəsində üstünlük qazanmağın əsas vasitəsi kimi görür.
