BAKI, AzerVoice
ABŞ Prezidenti Donald Tramp İsrail Baş naziri Benyamin Netanyahu ilə gərgin telefon danışığı apararaq, Qətərdə HƏMAS-ı hədəf alma qərarının “ağılsız addım” olduğunu bildirib.
AzerVoice xəbər verir ki, Wall Street Journalın məlumatına görə, İsrailin ABŞ-dan xəbərsiz şəkildə Qətərdəki HƏMAS liderlərini vurması Trampı və Qətəri qəzəbləndirib. Hadisədən sonra Tramp Netanyahunu sərt tonda tənqid edərək, bu hücumun “barış səylərinə və ABŞ-Qətər münasibətlərinə zərbə vurduğunu” deyib.
Netanyahu isə cavabında hücuma qərar vermək üçün “çox qısa zaman aralığı” olduğunu bildirib. Lakin Tramp hazırlıqsız yaxalanmanın yaratdığı məyusluq fonunda İsraili xəbərdar edib ki, bu addım həm diplomatik prosesləri, həm də Vaşinqtonun bölgədəki nüfuzunu risk altına salır.
Tramp gərginliyə baxmayaraq, İsrailin HƏMAS-a qarşı mübarizəsini dəstəkləməyə davam etdiyini vurğulayıb. Bununla belə, o, İsrailin qlobal imicini və ABŞ-ın diplomatik maraqlarını qorumaq üçün hücumların azaldılmasını vacib sayır.