BAKI,AzerVoice, Fərid Mikayılov

ABŞ Prezidenti Donald Tramp, Müdafiə Nazirliyinin adının “Müharibə Nazirliyi” olaraq dəyişdirilməsini nəzərdə tutan prezident fərmanına imza atıb.

AzerVoice xəbər verir ki, Tramp bu barədə Ağ Evdə keçirdiyi mətbuat konfransında açıqlama verib.

O bildirib ki, yeni qərarın qüvvəyə minməsi üçün Konqresdə hüquqi dəyişikliklərin edilməsi tələb olunur və bu istiqamətdə müraciətlər ediləcək.

“Birinci Dünya Müharibəsini qazandıq, İkinci Dünya Müharibəsini qazandıq. Ondan əvvəl və sonra da hər şeyi qazandıq. Sonra nazirliyin adını Müdafiə Nazirliyi etdik. İndi isə biz ona Müharibə Nazirliyi adını veririk”- deyə o bildirib.

Tramp, toplantıda iştirak edən Müdafiə naziri Pit Heqsetə müraciət edərək onu “Müharibə Nazirimiz” kimi təqdim edib və yeni adın “dünyanın hazırkı vəziyyəti nəzərə alındıqda daha uyğun olduğunu” söyləyib.

Tramp, jurnalistlərin “Konqres bu ad dəyişikliyi ilə bağlı qanunvericilik addımı atacaqmı?” sualına cavabında belə deyib:

“Bunu edəcəklərinə əmin deyiləm, amma məcbur olduqlarını bilirəm. Bu gün prezident fərmanını imzaladıq, indi isə Konqresin nə edəcəyini görəcəyik”- deyə Tramp vurğulayıb.

Qeyd edək ki, “Müharibə Nazirliyi” ABŞ Konstitusiyasının qüvvəyə mindiyi 1789-cu ildə yaradılmışdı. İkinci Dünya Müharibəsinin bitməsindən iki il sonra – 1947-ci ildə qəbul edilən qanunla isə qurumun adı “Müdafiə Nazirliyi” olaraq dəyişdirilmişdi.