BAKI, AzerVoice, Nərmin Ağayeva
ABŞ Latın Amerikasında narkotiklərlə mübarizə çərçivəsində bölgəyə səkkiz hərbi gəmi göndərib.
AzerVoice xəbər verir ki, “Washington Post”un məlumatına görə, ABŞ Müdafiə Nazirliyinin rəsmiləri Karib dənizi və Sakit okean sularında həyata keçiriləcək əməliyyat çərçivəsində gəmilərin yerləşdirildiyini bildiriblər. Hərbi gəmilər Mərkəzi və Cənubi Amerika ölkələri yaxınlığında fəaliyyət göstərəcək.
Məlumata görə, bölgəyə üç esmines (USS Gravely, USS Jason Dunham, USS Sampson), iki desant dok gəmisi, bir amfibiya hücum gəmisi, bir sürətli döyüş gəmisi və bir sahil döyüş gəmisi (LCS) göndərilib. Rəsmilər esmineslərin Venesuela sahillərinə “çox yaxın” olmadığını xüsusi vurğulayıblar. Ekipaj heyətində narkotik əməliyyatlarına cavabdeh zabitlərin də yer aldığı bildirilir.
Qeyd edək ki, ABŞ prezidenti Donald Tramp daha əvvəl Latın Amerikasında narkotik kartellərinə qarşı mübarizəni gücləndirmək üçün ordunun istifadəsini artıran icra sərəncamı imzalayıb. CNN-in məlumatına görə, Trampın göstərişi ilə bölgəyə 4 min dəniz piyadasının göndərilməsi və Venesuela sahillərinə əlavə üç hərbi gəminin yerləşdirilməsi qərarı qəbul olunub.
Venesuela prezidenti Nikolas Maduro isə ABŞ-ın bu addımına sərt reaksiya verərək, “Heç kim Venesuela ərazisinə toxunmağa cürət etməməlidir” deyib. O, həmçinin ABŞ-ın onun həbsinə aparan məlumat üçün mükafatı artırmasından sonra ölkə daxilində 4,5 milyondan çox milis qüvvəsinin yerləşdiriləcəyini açıqlayıb.
