BAKI, AzerVoice, Nərmin Ağayeva
ABŞ Danimarkanın daxili işlərinə müdaxilə iddialarına reaksiya verib.
AzerVoice xəbər verir ki, ABŞ rəsmiləri Qrenlandiya ilə bağlı yayılan məlumatlardan sonra Danimarkanın daxili işlərinə qarışmaq ittihamlarını rədd ediblər.
Ağ Evin anonim rəsmisi CBS News-a açıqlamasında “Biz hesab edirik ki, danimarkalılar sakit olmalıdırlar” - deyə bildirib.
ABŞ Dövlət Departamentinin sözçüsü isə amerikalı vətəndaşların Qrenlandiyadakı fəaliyyətlərinə dair şərh verməyəcəklərini, onların hərəkətlərinə nəzarət etmədiklərini qeyd edib. O, ABŞ-ın NATO-dakı müttəfiqi Danimarka ilə münasibətlərinə önəm verdiyini vurğulayaraq, Vaşinqtonun Danimarka xarici işlər naziri Lars Lokke Rasmussen ilə “məhsuldar görüş” keçirdiyini də əlavə edib.
Qeyd edək ki, Danimarkanın DR xəbər saytı daha əvvəl ABŞ prezidenti Donald Tramp və Ağ Evlə əlaqəsi olan ən azı üç ABŞ vətəndaşının Qrenlandiyada təsir kampaniyası apardığını iddia edən material dərc etmişdi. Həmin xəbərdə Trampı dəstəkləyən bir sıra Qrenlandiya sakinlərinin adlarının da hallandırıldığı bildirilirdi.