BAKI, AzerVoice, Nərmin Ağayeva

ABŞ prezidenti Donald Tramp Qəzza zolağındakı humanitar böhrana diqqət çəkərək, 2-3 həftə ərzində “olduqca yaxşı və qəti bir nəticə” əldə edilə biləcəyini bildirib.

AzerVoice xəbər verir ki, Tramp Cənubi Koreya prezidenti Li Jae Myungu Oval Ofisdə qəbul edərkən jurnalistlərin Qəzzadakı aclıq və humanitar böhranla bağlı suallarını cavablandırıb.

O, “Bu vəziyyətə bir an əvvəl son qoyulmalıdır. Aclıq və insanların öldürülməsi kimi problemlər davam edir,” deyərək, Qəzzadakı prosesin sonuna yaxınlaşdığını vurğulayıb. Tramp ABŞ-ın Qəzzaya 60 milyon dollarlıq ərzaq yardımı göndərdiyini və bu yardımın paylanıldığını bildirib.

ABŞ dövlət katibi Marko Rubio isə Qəzza ilə bağlı diplomatik səylərin davam etdiyini qeyd edib.

Qeyd edək ki, Trampın bu bəyanatları beynəlxalq ictimaiyyətin Qəzzadakı humanitar böhrana diqqətini cəlb etməyə çalışdığı bir dövrdə səslənib. Lakin BMT və digər təşkilatlar İsrailin humanitar yardım karvanlarına məhdudiyyətlər qoymasını tənqid edərək, vəziyyətin daha da ağırlaşdığını bildirir. Trampın qısa müddətdə nəticə gözləntisi ilə bağlı nikbinliyi isə regiondakı mürəkkəb siyasi və hərbi dinamikalar fonunda suallar doğurur.