BAKI, AzerVoice , Nərmin Ağayeva

Venesuela prezidenti Nikolas Maduro ABŞ-ı ölkəsində rejim dəyişikliyinə nail olmaq üçün “terrorçu və hərbi üsullardan” istifadə etməkdə ittiham edib.

AzerVoice xəbər verir ki, paytaxt Karakasda Milli Assambleyada çıxış edən Maduro ABŞ-ın planlarını “cinayətkar və qanunsuz” adlandırıb. Onun sözlərinə görə, Vaşinqtonun Venesuelaya qarşı hərəkətləri beynəlxalq hüquqa ziddir və suveren dövlətə qarşı güc tətbiqi qadağasını pozur.

Dəstək göstərən ölkələrə təşəkkür edən Maduro bildirib ki, ABŞ-ın Cənubi Amerikada silahlı qarşıdurma yaratmaq cəhdləri qəbulolunmazdır. “Venesuela yenidən qalib gələcək, yenidən sülh, sabitlik və inkişaf əldə edəcək. Allah bizimlədir, çünki Allah cəsurların və ədalətlilərin yanındadır”, – deyə dövlət başçısı vurğulayıb.

Maduro həmçinin ABŞ-ın bir çox ölkələrdə hərbi müdaxilə cəhdlərinin uğursuzluqla nəticələndiyini xatırladaraq, eyni ssenarinin Venesuelada da nəticə verməyəcəyini bildirib.

Qeyd edək ki, ABŞ prezidenti Donald Tramp daha əvvəl Latın Amerikası narkotik kartellərinə qarşı mübarizə məqsədilə bölgədəki hərbi qüvvələrin gücləndirilməsi barədə sərəncam imzalamışdı. CNN-in məlumatına görə, bu çərçivədə 4 min dəniz piyadası bölgəyə göndərilib və üç hərbi gəmi Venesuela sahillərinə yerləşdirilib.