BAKI, AzerVoice, Fərid Mikayılov

Böyük Britaniyanın baş naziri Kir Starmer ABŞ paytaxtında keçirilən yüksək səviyyəli görüşlərin nəticələrini dəyərləndirib.

AzerVoice xəbər verir ki, onun sözlərinə görə, ABŞ prezidenti Donald Tramp, Ukrayna lideri Volodimir Zelenski və Avropa siyasətçilərinin iştirakı ilə baş tutan danışıqlar yaxşı keçib və real irəliləyiş əldə olunub.

Starmer bildirib ki, sammitdə iştirak edən Avropa liderləri, Tramp və Zelenski arasında “həqiqi birlik hissi” formalaşıb.

Britaniya baş naziri danışıqlardan iki əsas nəticənin ortaya çıxdığını qeyd edib.

Birincisi, “istəkli ölkələr koalisiyası” ABŞ-la birlikdə Ukraynaya təhlükəsizlik zəmanətlərinin təmin olunması istiqamətində fəaliyyət göstərəcək.

İkincisi isə Rusiya prezidenti Vladimir Putin və Zelenski arasında ikitərəfli razılaşma imzalanması barədə prinsipial razılığın əldə olunmasıdır.

Xatırladaq ki, Starmer Ağ Evdəki görüş zamanı təkcə Ukraynanın deyil, bütövlükdə Avropanın təhlükəsizliyinin təmin edilməsinin vacibliyini vurğulayıb.

Fransa prezidenti Emmanuel Makron isə Avropanın da iştirakı ilə Ukrayna məsələsinə dair dördtərəfli görüşün keçirilməsini təklif edib. O, həmçinin Rusiya, ABŞ və Ukrayna arasında ayrıca görüşün də mümkünlüyünü istisna etməyib.