BAKI, AzerVoice, Nərmin Ağayeva

Ukrayna prezidenti Vladimir Zelenski Rusiya prezidenti Vladimir Putinlə ikitərəfli görüşə hazır olduğunu açıqlayıb.

AzerVoice xəbər verir ki, Zelenski bu fikri ABŞ prezidenti Donald Trampın Ağ Evdə ev sahibliyi etdiyi görüşdən sonra jurnalistlərə bildirib.

Zelenski əsas məsələlərin yalnız liderlər səviyyəsində həll oluna biləcəyini vurğulayaraq, Putinlə birbaşa danışıqlara hazır olduğunu təsdiqləyib. O, bu istiqamətdə Avropa liderlərinin də dəstəyini aldığını qeyd edib. Zelenski, həmçinin, bu danışıqların baş tutması üçün ABŞ-ın təzyiqinin mühüm rol oynaya biləcəyini bildirib.

Prezident qeyd edib ki, potensial görüşün tarixi hələ müəyyən edilməyib, lakin əsas müzakirə mövzularının təhlükəsizlik zəmanətləri və ərazi məsələləri olacağını gözləyir. Onun sözlərinə görə, ABŞ ilə danışıqlar zamanı Ukrayna xəritələri üzərində real vəziyyət ilk dəfə müzakirə edilib.

Zelenski əlavə edib ki, ölkəsinin təhlükəsizlik zəmanətlərinin yaxın 7-10 gün ərzində rəsmiləşdirilməsi nəzərdə tutulur. Bu paketə ABŞ-dan 90 milyard dollarlıq silah alışının da daxil olduğu bildirilir.

Qeyd edək ki, Ağ Evdə keçirilən görüşdə ABŞ prezidenti Donald Tramp, NATO-nun baş katibi Mark Rutte, Avropa Komissiyasının sədri Ursula fon der Leyen, Fransa prezidenti Emmanuel Makron, Böyük Britaniyanın baş naziri Key Starmer, Finlandiya prezidenti Aleksander Stubb, İtaliyanın baş naziri Giorgia Meloni və Almaniya kansleri Fridrix Merz iştirak ediblər. Tramp avqustun 15-də Alyaskada Putinlə görüşsə də, yekun razılaşma əldə olunmadığını açıqlamışdı.