BAKI, AzerVoice, Səməd Əyyubov

Ağ Ev rəsmiləri Ukrayna prezidenti Volodimir Zelenskidən Vaşinqtonda ABŞ prezidenti Donald Tramp ilə görüşə kostyum və qalstukla gəlməsini xahiş ediblər.

AzerVoice xəbər verir ki, bu tələb Ukrayna tərəfinə Ağ Evin protokol xidməti vasitəsilə çatdırılıb.

Bundan əvvəl “Axios” yazmışdı ki, Zelenski avqustun 18-də keçiriləcək görüşə iyunda Niderlanddakı NATO sammitində geyindiyi qara pencəklə qatılmağı planlaşdırır. Mənbələrin sözlərinə görə, o, biznes üslubuna üstünlük verəcək, amma qalstuk taxmayacaq.

Xatırladaq ki, fevral ayında Ağ Evdə keçirilən görüşdə Zelenski qara sviter və şalvarla iştirak etmişdi. Tramp isə bunu ironiya ilə qarşılayaraq onun “bəzəndiyini” qeyd etmişdi. Həmin görüşdə jurnalistlər Zelenskidən niyə kostyum geyinmədiyini soruşduqda, o, müharibə bitəndən sonra kostyum geyinəcəyini cavablandırmışdı. Tramp isə bunu “ABŞ-a hörmətsizlik” adlandırmış, vitse-prezident Cey Di Vens də Ukraynanın göstərilən yardıma görə təşəkkür etmədiyini vurğulamışdı.

Avqustun 18-də Vaşinqtondakı görüşdə Zelenskiyə Fransa prezidenti Emmanuel Makron, Böyük Britaniyanın baş naziri Kir Starmer, Almaniya kansleri Fridrix Mers, İtaliyanın baş naziri Corca Meloni və Avropa Komissiyasının rəhbəri Ursula fon der Lyayen də qoşulacaq. NBC News-un məlumatına görə, görüşdə Ukraynaya təhlükəsizlik təminatları məsələsi də müzakirə olunacaq.

Xatırladaq ki, Alyaskanın Ankoric şəhərində yerləşən “Elmendorf-Riçardson” hərbi bazasında iki liderin məhdud formatda görüşü baş tutub. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransında çıxış ediblər.