BAKI, AzerVoice, Səməd Əyyubov

ABŞ Müdafiə Nazirliyi Latın Amerikası yaxınlığındakı dəniz akvatoriyasına 4 mindən çox dənizçi və dəniz piyadası göndərir.

AzerVoice xəbər verir ki, “Bloomberg” agentliyinin məlumatına görə, bu addım prezident Donald Trampın narkokartellərə qarşı mübarizədə hərbi qüvvələrdən istifadə edə biləcəyini bəyan etməsindən sonra atılıb.

Məlumata əsasən, ABŞ-ın Cənub Komandanlığının (Cənubi və Mərkəzi Amerika, həmçinin Karib hövzəsini əhatə edir) məsuliyyət zonasında xidmət aparmaq üçün “İvodzima” amfibiya-desant qrupu və 22-ci ekspedisiya dəniz piyadaları briqadası göndərilib. Bu qüvvələr böhran vəziyyətlərində reaksiya göstərmək üçün birgə qrup kimi fəaliyyət göstərəcək.

Hərbi kontingentin dəqiq tapşırıqları açıqlanmasa da, “The New York Times” daha əvvəl yazmışdı ki, Tramp Pentaqona Latın Amerikasındakı narkokartellərə qarşı hərbi əməliyyat variantlarını hazırlamağı tapşırıb. Bununla belə, Meksika öz ərazisində ABŞ qüvvələrinin yerləşdirilməsini qəti şəkildə istisna edib.

ABŞ Hərbi Dəniz Qüvvələri əvvəlcə bu bölmənin Virciniya ştatının Norfolk bazasından “planlı yerləşdirmə” adı ilə göndərildiyini açıqlamışdı. Lakin indi bəlli olub ki, yaxın aylarda Cənub Komandanlığı kartellərə qarşı mümkün əməliyyatlar üçün əlavə resurslar əldə edəcək.