BAKI, AzerVoice, Nərmin Ağayeva

ABŞ-ın NATO-dakı səfiri Matt Whitaker bəyan edib ki, Ukraynanın təhlükəsizliyinə zəmanət verilməsi üçün bir növ koalisiya və ya ittifaqın yaradılması gündəmdədir.

AzerVoice xəbər verir ki, CNBC-yə açıqlama verən Whitaker, ABŞ prezidenti Donald Trampın Rusiya prezidenti Vladimir Putinlə görüşünün ardından Ukrayna prezidenti Vladimir Zelenski ilə görüşünü şərh edib. O bildirib ki, NATO özü də bir koalisiyadır və Ukrayna üçün təhlükəsizlik zəmanəti oxşar formatda həyata keçirilə bilər.

Diplomat qeyd edib ki, bu prosesdə hər iki tərəf – nə Rusiya, nə də Ukrayna – bütün istəklərinə nail ola bilməyəcək. “Ukrayna istənilən razılaşmanı qəbul etməli olacaq. Əsas məqsəd Rusiyanın bir daha hücum etməsinin qarşısını almaqdır və bu da Ukraynanı gücləndirməklə mümkün olacaq”. - deyə o bildirib.

Whitaker həmçinin vurğulayıb ki, təhlükəsizlik zəmanətləri çox kritik olacaq və Ukrayna bunları yalnız anlamalı deyil, həm də NATO müttəfiqlərinə izah etməlidir. Onun sözlərinə görə, alyans ölkələri də prosesə dəstək verməyə hazır olmalıdır.

Qeyd edək ki, Tramp Zelenskini Krımdan və NATO üzvlüyündən imtina etməyə çağırıb. ABŞ isə Putinin sülh sazişinin bir hissəsi kimi Ukraynanın təhlükəsizliyinə zəmanət verməyə razılaşdığını açıqlayıb.