BAKI, AzerVoice , Nərmin Ağayeva
İordaniya, Suriya və ABŞ Suriyadakı vəziyyətə dair üçtərəfli görüşə start verib.
AzerVoice xəbər verir ki, İordaniya Haşimilər Krallığının ev sahibliyi ilə bu gün Əmmanda İordaniya-Suriya-ABŞ üçtərəfli görüşü başlayıb. İordaniya Xarici İşlər və Qürbətçilər Nazirliyində keçirilən toplantıda Suriyadakı mövcud vəziyyət və ölkənin yenidən qurulması prosesinə dəstək yolları müzakirə olunur.
PETRA agentliyinin məlumatına görə, görüşdə Suriyanın xarici işlər naziri Əsəd Şeybani, ABŞ-ın Türkiyədəki səfiri və Suriya üzrə xüsusi nümayəndəsi Tomas Barak, həmçinin üç ölkənin müvafiq qurumlarının nümayəndələri iştirak edir. Toplantı, 8 iyulda Suriyanın cənubunda daimi sülhün yaradılması məqsədilə başlanan danışıqların davamıdır.
Qeyd edək ki, İordaniyanın baş nazirinin müavini və xarici işlər və qürbətçilər naziri Ayman Safadi görüş öncəsi Barak və Şeybani ilə ayrıca görüşərək Suriyadakı vəziyyət və böhranın həlli istiqamətində atılan addımları müzakirə edib.
