BAKI, AzerVoice, Zeynəb Raminqızı

Hollandiya, NATO-nun ABŞ vasitəsilə Ukraynaya silah tədarükünü nəzərdə tutan yeni “Ukraynanın Prioritet Ehtiyaclar Siyahısı” (PURL) mexanizmi çərçivəsində Ukraynaya dəstək verən ilk NATO ölkəsi olub.

AzerVoice xəbər verir ki, Hollandiya Müdafiə Nazirliyi tərəfindən verilən açıqlamada bildirilib.

Açıqlamada Ukraynanın hava hücumundan müdafiəsini gücləndirmək məqsədilə hava hücumundan müdafiə avadanlığı, sursat və digər zəruri hərbi materialları əhatə edən 500 milyon avro dəyərində yeni yardım paketi təqdim ediləcəyi qeyd olunub.

Nazirliyin məlumatına görə, bu yardımlar çərçivəsində iki dəstək paketi avqust ayında Ukraynaya çatdırılacaq. PURL mexanizmi üzrə yeni hərbi avadanlıqların iki-üç həftəlik intervallarla davamlı olaraq çatdırılması planlaşdırılır.

“Avadanlıqların sürətli çatdırılması gələcəkdə Ukraynanın danışıqlar masası arxasındakı mövqeyini gücləndirəcək”, – deyə rəsmi bəyanatda vurğulanıb.

Hollandiya müvəqqəti hökumətinin baş naziri Dik Şof, Ukrayna prezidenti Vladimir Zelenski ilə telefon danışığının detallarını sosial media üzərindən paylaşaraq, 500 milyon avroluq hərbi yardım paketinin razılaşdırıldığını və Zelenskinin Hollandiya tərəfinə təşəkkür etdiyini bildirib.

“Hollandiya NATO ilə ABŞ arasında Ukraynanın hava hücumundan müdafiə vasitələrinin alınması daxil olmaqla razılaşdırılmış məsələləri həyata keçirən ilk ölkə oldu”, – deyə baş nazir bəyan edib.

NATO-nun baş katibi Mark Rutte “Digər NATO ölkələrindən də addım gözləyirik”- deyə qeyd edib.

Qeyd edək ki, ABŞ prezidenti Donald Tramp iyulun 14-də Ağ Evdə keçirdiyi mətbuat konfransında Hollandiya ilə Ukraynaya silah tədarükünə dair razılaşma əldə olunduğunu açıqlayıb.

Tramp qeyd edib ki, bu silahlar ABŞ-da istehsal olunacaq və xərcləri NATO müttəfiqləri qarşılayacaq.