BAKI, AzerVoice, Zeynəb Raminqızı

Portuqaliya və İspaniyada meşə yanğınları ilə mübarizə davam etdirilir.

AzerVoice xəbər verir ki, Portuqaliyada davam edən həddindən artıq istilər səbəbindən ölkədə artıq iki gündür yüksək hazırlıq vəziyyəti elan olunub.Şimal bölgələrində yayılan meşə yanğınları ilə mübarizə çətinləşir.

Vila Real və Mondim de Basto bölgələrində hal-hazırda dörd böyük aktiv yanğın qeydə alınıb. Rəsmilər bildirir ki, alovun söndürülməsinə 800-dən çox yanğınsöndürən, 282 texnika və 9 hava nəqliyyatı vasitəsi cəlb edilib.

Ən böyük yanğın Vila Real bölgəsində qeydə alınıb. Burada 522 yanğınsöndürən alovun qarşısını almaq üçün səfərbər olunub. Əməliyyatlara Latviyanın Xüsusi Təyinatlı Qüvvələrindən olan 16 nəfərlik heyət də dəstək verir.

Səlahiyyətlilər yanğınsöndürənlərin artıq günlərlə fasiləsiz çalışdıqlarını və ciddi şəkildə yorulduqlarını bildirərək, hökumətdən əlavə qüvvələr göndərməyi tələb ediblər.

Portuqaliya hökuməti yeni istilər səbəbindən 7 avqusta qədər həyəcan siqnalı elan edib.

Portuqaliyanın qonşusu İspaniya da anormal istilərin təsiri altındadır. Ölkənin doqquz muxtar bölgəsində hava temperaturu 42°C-yə qədər yüksəlib. Buna görə də, müvafiq qurumlar “narıncı həyəcan” rejimi tətbiq ediblər.

İspaniyanın Badajoz şəhərində 85 yaşlı bir kişi günvurma nəticəsində həyatını itirib. Rəsmilər bildirirlər ki, meşə yanğınları nəzarət altına alınsa da, anomal temperatur səbəbilə yeni yanğınların başvermə riski hələ də yüksək olaraq qalır.

Avropanın cənub-qərbində, xüsusilə Pireney yarımadasında, yay ayları anomal istilərlə müşayiət olunur. Meteoroloqlar bildirirlər ki, bu yay ikinci dəfə müşahidə olunan istilər həftə sonuna qədər davam edəcək.

Təbii fəlakət riski fonunda həm Portuqaliya, həm də İspaniya vətəndaşları yanğın təhlükəsi və yüksək temperaturla bağlı xəbərdar edilib.