BAKI, AzerVoice
ABŞ prezidenti Donald Tramp bildirib ki, Rusiya prezidenti Vladimir Putin və Ukrayna prezidenti Volodimir Zelenski təxminən iki-üç ay ərzində görüş keçirə bilərlər.
AzerVoice xəbər verir ki, bu barədə Tramp jurnalistlərin suallarını cavablandırarkən deyib.
“Bu baş verə bilər, amma iki-üç ay sonra baş verə bilər” – deyə, Ağ Evin mətbuat xidməti onun sözlərini sitat gətirib.
Qeyd edək ki, çərşənbə günü Rusiya-Ukrayna danışıqlarının üçüncü raundu zamanı Rusiya nümayəndə heyətinin rəhbəri Vladimir Medinski, Putin və Zelenski arasında mümkün görüş üçün əvvəlcə razılaşmanın şərtlərinin hazır olmasının vacibliyini bildirmişdi.
“Belə bir görüşün baş tutması üçün əvvəlcədən razılaşma şərtləri hazırlanmalı və bu görüşdə müzakirə olunacaq məsələlər müəyyən edilməlidir. Əslində isə bu görüşdə razılaşmanı müzakirə etmək yox, yekunlaşdırmaq, imzalamaq lazımdır. Əgər hər şeyi sıfırdan, yenidən müzakirə etmək üçün görüş keçiriləcəksə, bunun heç bir mənası yoxdur” - deyə, Medinski vurğulayıb.
